မကွေးတိုင်း၊ မြိုင်မြို့နယ်တွင် စစ်ကောင်စီတပ်မီးရှိူ့ဖျက်ဆီးသွားသည့်ကျေးရွာများအား ပြည်သူ့ကာကွယ် ရေးတပ်ဖွဲ့က အိမ်ထောင်စုတစ်စုလျှင် ကျပ်တစ်သိန်းနှုန်း ထောက်ပံ့ခဲ့သည်။
မြိုင်မြို့နယ်အတွင်း စစ်ကောင်စီတပ်က မီးရှို့ဖျက်ဆီးသွားသည့် ရွာသစ်ကြီးကျေးရွာမှ နေအိမ် ၇၆ လုံး၊ နှမ်းစားကျင်းရွာမှ ၇လုံးနှင့် သံဘိုကြီးရွာမှ ၁၀လုံး၏ အိမ်ထောင်စုများအား ယမန်နေ့ (မေလ ၁၂ ရက်)က အိမ်ထောင်စုတစ်စုလျှင် ကျပ်တစ်သိန်းဖြင့် ၉၃ သိန်းကျပ် မျှဝေလှူဒါန်းပေးခဲ့ကြောင်း မြိုင်မြို့နယ်ပြည်သူ့ကာကွယ်ရေးတပ်ဖွဲ့က ပြောသည်။
![](https://i0.wp.com/www.ludunwayoo.com/wp-content/uploads/2022/05/280445150_380402184149240_7935504557095551073_n.jpg?resize=720%2C342&ssl=1)
ထို့အပြင် စစ်ကောင်စီတပ်၏ သတ်ဖြတ်ခြင်းခံခဲ့ရသော အပြစ်မဲ့ပြည်သူ နှစ်ဦး၏ ကျန်ရစ်သူ မိသားစုများအား တစ်အိမ်ထောင်လျှင် ငါးသိန်းကျပ် ထောက်ပံ့ခဲ့ကြောင်း၊ စုစုပေါင်း ကျပ်၁၀၃သိန်း ထောက်ပံ့ခဲ့သည်ဟု မြိုင်မြို့နယ်ပြည်သူ့ကာကွယ်ရေးတပ်ဖွဲ့က အသိပေးသည်။
မိဘပြည်သူများမှလှူဒါန်းငွေများနှင့် မြိုင်အဖွဲ့မှ ထုတ်လုပ်သော လက်လုပ်လက်နက်များအား မဟာမိတ်များထံသို့ မျှဝေခြင်းမှရရှိလာသော ငွေကြေးများအား လှူဒါန်းခြင်းဖြစ်ကြောင်း မြိုင်မြို့နယ် ပြည်သူ့ကာကွယ် ရေးတပ်ဖွဲ့က ပြောသည်။
![](https://i0.wp.com/www.ludunwayoo.com/wp-content/uploads/2022/05/280757533_380402227482569_3154928834851342873_n.jpg?resize=720%2C342&ssl=1)
“ပြည်သူတွေမှာ နေစရာမရှိစားစရာမရှိတော့ ကျွန်တော်တို့က ဘယ်လိုလုပ်ကြည့်နေနိုင်မှာလဲဗျာ။ ပြည်သူထဲက ပြည်သူပဲလေ ကျွန်တော်တို့က။ မင်းအောင်လှိုင်ရဲ့ စကစတွေသာ အထက်အမိန့်ကို နာခံနေကြတာ မှားတာမှန်တာ မခွဲခြားတတ်ဘဲ။”ဟု မြိုင်မြို့နယ်ပြည်သူ့ကာကွယ်ရေးတပ်ဖွဲ့တာဝန်ရှိသူက ပြောသည်။
စစ်ကောင်စီတပ်သည် မြိုင်မြို့နယ်အတွင်းရှိ ကျေးရွာများသို့ စစ်ကြောင်းသုံးကြောင်းဖြင့် ဝင်ရောက်ဖျက်ဆီးနေပြီး ပြည်သူအချို့လည်း သတ်ဖြတ်ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)