စစ်ကိုင်းတိုင်း၊ ယင်းမာပင်မြို့နယ်တွင် အကြမ်းဖက်စစ်ကောင်စီတပ်အား ဒေသကာကွယ်ရေးတပ်ဖွဲ့များက ခုခံတိုက်ခိုက်ရာ နှစ်ဖက်ထိခိုက်မှုများရှိကြောင်း အမိမြေတော်လှန်ရေးတပ်ဖွဲ့က သတင်းထုတ်ပြန်သည်။
ယမန်နေ့(မေလ ၁၂ ရက်) နေ့လယ်ပိုင်းက ယင်းမာပင်မြို့နယ်၊ သီးကုန်းကျေးရွာအနီးတွင် အင်အား ၁၀၀ခန့်ရှိသော စစ်ကောင်စီစစ်ကြောင်းအား အမိမြေတော်လှန်ရေးတပ်ဖွဲ့နှင့် အခြားဒေသတွင်းအဖွဲ့များပူးပေါင်းပြီး တိုက်ခိုက်ခဲ့ခြင်းဖြစ်သည်။
![](https://i0.wp.com/www.ludunwayoo.com/wp-content/uploads/2022/05/280236357_380619344127524_9205129609978826558_n.png?resize=720%2C324&ssl=1)
လက်နက်ကြီး၊ လက်နက်ငယ်များဖြင့် အချိန်အတော်ကြာ အပြန်အလှန်ပစ်ခတ်ခဲ့ကြသည်ဟု အမိမြေတော်လှန်ရေးတပ်ဖွဲ့က ပြောသည်။
![](https://i0.wp.com/www.ludunwayoo.com/wp-content/uploads/2022/01/PSA_inside_Story_Jan22-03.jpg?resize=880%2C229&ssl=1)
ယနေ့(မေလ ၁၃ ရက်)နံနက် ၇နာရီခန့်က ကျောက်ပြုတ်ကျေးရွာအနီးတွင် အဆိုပါ စစ်ကြောင်းနှင့်အပြန်အလှန်ပစ်ခတ်မှုဖြစ်ပွားရာ တစ်နာရီနီးပါးကြာမြင့်ခဲ့ကြောင်း၊ တိုက်ပွဲနှစ်ခုတွင် အကြမ်းဖက်စစ်ကောင်စီဘက်မှ ထိခိုက်သေဆုံးမှုများရှိနိုင်ပြီး ပူးပေါင်းတပ်ဖွဲ့မှ ရဲဘော်ခြောက်ဦး ထိခိုက်ဒဏ်ရာရရှိထားသည်ဟု အမိမြေတော်လှန်ရေးတပ်ဖွဲ့က ပြောသည်။
ထုတ်ပြန်ချက်နှင့်ပတ်သက်၍ အမိမြေတော်လှန်ရေးတပ်ဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပါ။
![](https://i0.wp.com/www.ludunwayoo.com/wp-content/uploads/2022/05/280239892_380619647460827_7267502030219451255_n.png?resize=720%2C539&ssl=1)
စစ်ကောင်စီတပ်သည် မေလ ၁၂ ရက်က ယင်းမာပင်မြို့နယ်၊ နဘူးတောကျေးရွာကို ဝင်ရောက်ကာ နေအိမ် ခြောက်လုံးကို မီးရှို့ဖျက်ဆီးခဲ့ပြီး အမျိုးသမီးတစ်ဦးကိုလည်း သတ်ဖြတ်သွားခဲ့သည်။
အမိမြေတော်လှန်ရေးတပ်ဖွဲ့သည် မေလ ၁၁ရက်ကလည်း မုံရွာ-ညောင်ပင်ကြီးမှတစ်ဆင့် ယင်းမာပင်ဘက်သို့ တက်လာသော စစ်ကားများကို Young People Force အဖွဲ့နှင့်ပူးပေါင်းပြီး မိုင်းခွဲတိုက်ခိုက်ခဲ့သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)