မကွေးတိုင်း ထီးလင်းမြို့နယ် ရေမျက်နီ ရဲစခန်းကို ယမန်နေ့ညပိုင်းက ဝင်ရောက်တိုက်ခိုက်ခဲ့ရာ စစ်ကောင် စီတပ်မှ သေဆုံးထိခိုက်ရှိနိုင်ကြောင်း ထီးလင်းပြည်သူ့ကာကွယ်ရေးတပ်(PDF)က သတင်းထုတ်ပြန်သည်။
မေလ ၁၆ရက် ည ၈နာရီ ၁၀မိနစ်ခန့်တွင် ရေမျက်နီကျေးရွာရဲစခန်းအား စခန်းသိမ်းတိုက်ပွဲဆင်နွှဲရန်၀င်ရောက်တိုက်ခိုက်ခဲ့ရာ အပြန်အလှန်ပစ်ခတ်မှု ဖြစ်ပွားပြီး ထီးလင်း PDFရဲဘော်တစ်ဦး ကျည်ထိမှန်ကာ စိုးရိမ်ရသည့် ဒဏ်ရာရရှိခဲ့သည်ဟု ဆိုသည်။
ကျည်ထိမှန်သော ရဲဘော်၏ ဒဏ်ရာပြင်းထန်မှု့ကြောင့် ပြန်လည်ဆုတ်ခွာခဲ့ရကြောင်း ထုတ်ပြန်ခဲ့ပြီး ရန်သူဘက်မှ ထိခိုက်ကျဆုံးမှု့ ရှိနိုင်ကြောင်း၊ အခြေအနေစုံစမ်းဆဲဖြစ်ကြောင်း ဖော်ပြထားသည်။
ထီးလင်း PDFသည် ဧပြီ ၁၇ရက်ကလည်း ထီးလင်းမြို့နယ် ကျင်းကျေးရွာ နယ်မြေရဲစခန်းကို ဝင်ရောက်တိုက်ခိုက်သိမ်းပိုက်ခဲ့သည်။ အဆိုပါ တိုက်ခိုက်မှုဖြစ်စဉ်တွင် စခန်းမှူးအပါအဝင် စစ်ကောင်စီ လက်ပါးစေရဲသုံးဦးသေဆုံးပြီး ရဲ၁၀ဦး အရှင်ဖမ်းမိခဲ့ကြောင်း၊ လက်နက်များလည်းရရှိခဲ့ကြောင်း ထီးလင်း PDFက ထုတ်ပြန်ခဲ့သည်။
