မြစ်ကြီးနား – ပူတာအိုလမ်းရှိ ပြည်သူများကို စစ်ကောင်စီက သွားလာရေး ကန့်သတ်ထား၍ အခက်ကြုံနေရ
“မနေ့ကတော့ မိုင်ထောင်နဲ့ ခဂရန်း ကြားမှာဖြစ်တယ်။ ဒါပေမဲ့ အသေအပျောက် ဘယ်လောက်ရှိတယ်ဆိုတာ မသိသေးဘူး။ အဓိကတော့ စစ်ကောင်စီက ပူတာအိုကို ထောက်ပို့ပေါ့နော် သူတို့ရဲ့ စစ်လက်နက်တွေရော ရိက္ခာတွေရော လာပြီးတော့ ပို့တာ အဲဒါကြောင့် KIAနဲ့ PDF ပူးပေါင်းတပ်တွေက တိုက်ပွဲတွေဖြစ်ကြတာ”ဟု ပူတာအိုဒေသခံက ပြောသည်။
ယနေ့ တိုက်ပွဲဆက်လက်ဖြစ်ပွားသည်ကိုမူ မကြားရသေးကြောင်း၊ သို့ရာတွင် စစ်ကောင်စီတပ်များက ဒေသခံများ၏ သွားလာရေး ကိစ္စများကို ကန့်သတ်ထား၍ အခက်အခဲကြုံနေရကြောင်း ၎င်း ကဆိုသည်။
ဓနယ်မြေဒေသကကျတော့ မြို့ပေါ်မှာ နည်းနည်းအေးဆေးတယ်။ ဒါပေမဲ့ ရွာဘက်တွေကျတော့ တိုက်ပွဲတွေ နည်းနည်း ပြင်းထန်ပြီးတော့ ရွာတွေတောင်ထွက်ပြေးနေရတာရှိတယ်။ သူတို့ကျတော့ သွားရေးလာရေး တောင်ယာသွားတာတို့ လယ်သွားတာတို့ တောထဲသွားတာတို့ ဆိုရင် အကုန်လုံး ခွင့်တိုင်ပြီးတဲ့အခါကျတော့ ပြီးရင် ၆နာရီ နောက်ပိုင်း အကုန် အိမ်ပြန်ရောက်ရမယ်ဆိုတာမျိုးတွေ ကန့်သတ်ထားတယ်။ ရွာကနေ ၂မိုင်ထက် ဝေးတဲ့နေရာမျိုးတွေ မသွားရဘူးဆိုတာမျိုး ကန့်သတ်တဲ့အခါကျတော့ အခုက အကုန်လုံးက တောင်သူတွေပဲ နေတဲ့အခါ တောတောင်ကို စိတ်ကြိုက်သွားလို့မရတဲ့အခါမှာ အခက်အခဲတွေ အများကြီးရှိတယ်”ဟု ဒေသခံက ပြောသည်။
ထိုသို့ ကန့်သတ်မှုများ ရေရှည်လုပ်ဆောင်ပါက ဒေသခံများ ဝမ်းစာဖူလုံရေးအတွက် အခက်အခဲဖြစ်စေနိုင်သည်ဟု ဆိုသည်။
