နိုင်ငံအတွင်း စက်သုံးဆီပြတ်လပ်နိုင်သည်ဆိုသောသတင်းများထွက်ပေါ်လာပြီးနောက် အောက်တိန်း ၉၂ တစ်လီတာလျှင်ကျပ် ၂၂၀၀ကျော်အထိ ဈေးတက်လာကြောင်း စက်သုံးဆီဝယ်ယူသူများကပြောသည်။
နိုင်ငံအတွင်းစက်သုံးဆီ အဓိကတင်သွင်းရောင်းချနေသည့် Denko ကုမ္ပဏီက စက်သုံးဆီလေးမျိုးအနက် အောက်တိန်း ၉၂ နှင့် ၉၅ များသည် လက်ကျန်နည်းနေ၍ မကြာခင် အောက်တိန်း ၉၅ ပြတ်လပ်တော့မည်ဟု စစ်ကောင်စီထိန်းချုပ်ထားသည့် စွမ်းအင်ဝန်ကြီးဌာနထံ တင်ပြသည့်စာ ပေါက်ကြားလာခြင်းဖြစ်သည်။
Denko ဆီဆိုင်က စစ်ကောင်စီ စွမ်းအင်ဝန်ကြီးဌာန၊ ရေနံထွက်ပစ္စည်းကြီးကြပ်စစ်ဆေးရေးဦးစီးဌာန ထံတင်ပြသည့်စာတွင် ၎င်းတို့ထံတွင် စက်သုံးဆီလေးမျိုးအနက် အောက်တိန်း နှစ်မျိုးမှာ လက်ကျန်နည်းနေပြီး ၊ မိတ်ဆွေကုမ္ပဏီများထံမှ ချေးငှားခြင်း၊ ဝယ်ယူခြင်းတို့ဖြင့် ဖြန့်ဖြူးရောင်းချနေသော်လည်း အောက်တိန်း ၉၅မှ လိုသလောက်မရတော့ဟု Denkoကဆိုထားသည်။
ရန်ကုန်နှင့် မန္တလေးဆိုင်များကို ဦးစားပေးရောင်းချမည်ဖြစ်သော်လည်း ဆိုင် ၃၈ ဆိုင်တွင် အောက်တိန်း ၉၅ ကုန်ပါက ရောင်းချမှုရပ်နားမည်ဟုဆိုထားသည်။
အဆိုပါစာလူမှုကွန်ယက်တွင် ပေါက်ကြားပြီးနောက်Denkoကုမ္ပဏီက ယနေ့တွင်ကုမ္ပဏီ၏ဖေစ်ဘွခ်စာမျက်နှာတွင် ဆီသင်္ဘောများရောက်ရှိပြီဖြစ်၍ စက်သုံးဆီများကို အခက်အခဲမရှိရောင်းချပေးမည်ဟု ချက်ချင်းထုတ်ပြန်ခဲ့သည်။
ထိုအတူ စစ်ကောင်စီထိန်းချုပ်ထားသည့် ရေနံထွက်ပစ္စည်းကြီးကြပ်စစ်ဆေးရေးဦးစီးဌာနကလည်း စက်သုံးဆီတင်လာသည့် သင်္ဘော လေးစီးသည် ဆိပ်ကမ်းတွင် ဆီများချနေပြီး နောက်ထပ်လေးစီးလည်း ထပ်မံဆိုက်ကပ်ဦးမည်ဟုချက်ချင်း ထုတ်ပြန်ကြေညာခဲ့သည်။
“ဒီလို စာတွေ တရစပ်ထုတ်နေတယ်ဆိုကတည်းက ဆီပြတ်လပ်တော့မယ်ဆိုတာ သွယ်ဝှိုက်သတိပေးနေတာပါ။ ဒေါ်လာ အရမ်းလိုနေလို့ ဆီဝယ်ဖို့ ခက်ခဲနေတာ လုပ်ငန်းရှင်တိုင်းသိပါတယ်”ဟု လုပ်ငန်းရှင်တစ်ဦးကပြောသည်။
မြို့ပြများတွင် အောက်တိန်းမှာအများဆုံးအသုံးပြုကြသဖြင့် ဆိုင်အချို့တွင် အောက်တိန်း ၉၅ ဝယ်ယူ၍ မရသော်လည်း နေရာအများစုတွင်မူ ဝယ်ယူရနိုင်သေးကြောင်း ယနေ့ဆီဖြည့်တင်းခဲ့သူတစ်ဦးကပြောသည်။
အောက်တိန်းဆီပြတ်လပ်နိုင်သည်ဆိုသောသတင်းကြောင့် မေ ၁၉ တွင် ဈေးကွက်အတွင်း အောက်တိန်း ၉၂ တစ်လီတာလျှင် ၂၂၁၀ ကျပ် ၊ အောက်တိန်း ၉၅ တစ်လီတာလျှင် ၂၂၈၀ကျပ်နှင့် ဒီဇယ် တစ်လီတာကို ၂၂၀၀ကျပ် အထိမြင့်တက်သွားသည်။
မေ ၁၇ ရက်တွင် အောက်တိန်း ၉၂ တစ်လီတာလျှင် ၂၀၉၀ကျပ်၊ အောက်တိန်း ၉၅ တစ်လီတာကို ၂၁၅၀ကျပ်နှင့် ဒီဇယ်တစ်လီတာကို ၂၂၆၀ကျပ်သာ ရှိခဲ့သည်။
နယ်မြို့ အချို့တွင် အောက်တိန်းဆီမှာ ပြတ်လပ်သွားပြီးဝယ်ယူမရဖြစ်နေသည်။
