စစ်ကိုင်းတိုင်းနှင့် မကွေးတိုင်းအတွင်းရှိ လမ်းပိုင်းအချို့ကို ဖြတ်သန်းသွားလာခွင့် ယာယီပိတ်သိမ်းထားကြောင်း ဒေသတွင်းပြည်သူ့ကာကွယ်ရေးအဖွဲ့များက ပြောသည်။
မကွေးတိုင်း၊ မြိုင်မြို့နယ်တွင် အကြမ်းဖက်စစ်တပ်သည် ဒေသခံများ၏ကားများကို အသုံးပြုကာသွားလာနေသောကြောင့် မြိုင် – ပခုက္ကူလမ်းအား အရေးကြီးကိစ္စများမှလွဲ၍ သွားလာခြင်းမပြုဘဲ ပူးပေါင်းဆောင်ရွက်ပေးပါရန်နှင့် အရေးကြီးသွားလာရန်လိုအပ်ပါက ဆိုင်ရာအဖွဲ့များသို့ အကြောင်းကြားသွားလာကြပါရန် မြိုင်မြို့နယ်ပြည်သူ့ကာကွယ်ရေးတပ်ဖွဲ့က မေတ္တာရပ်ခံသည်။
သတိပေးမေတ္တာရပ်ခံချက်သည် နောက်တစ်ကြိမ် သတင်းမထုတ်မပြန်မချင်း သက်ရောက်နေမည်ဖြစ်ကြောင်း မြိုင်မြို့နယ်ပြည်သူ့ကာကွယ်ရေးတပ်ဖွဲ့က ပြောသည်။
ထို့အပြင် စစ်ကိုင်းတိုင်း၊ မုံရွာမြို့ သာစည်လမ်းပေါ်တွင် ယနေ့(မေလ ၂၆ ရက်) နံနက် ၉နာရီမှစ၍ ခေတ္တာယာယီပိတ်ထားကြောင်း ဒေသတွင်းမြို့ပြပြောက်ကျားအဖွဲ့များက အသိပေးသည်။
လမ်းပိတ်ရခြင်းမှာ မိုင်းများမတော်တဆ ပေါက်ကွဲမှုများဖြစ်ပေါ်နိုင်၍ ခေတ္တယာယီပိတ်ထားရခြင်းဖြစ်ကြောင်း မြို့ပြပြောက်ကျားအဖွဲ့များက ပြောသည်။
အလားတူ စစ်ကိုင်းတိုင်း၊ ခင်ဦးမြို့နယ်အတွင်းရှိလမ်းပိုင်းအားလုံးလည်း ယာယီပိတ်လိုက်ကြောင်း ခင်ဦးအခြေစိုက် ပြည်သူ့ကာကွယ်ရေးအဖွဲ့များက ပြောသည်။
ပြန်လည်သွားလာရန် ပြန်လည်ခွင့်ပြုပေးမည့်အချိန်ကို ထုတ်ပြန်ပေးမည်ဟု ၎င်းအဖွဲ့များက ပြောသည်။
