ဗန်းမောက်မြို့နယ်တွင် KIA/PDF ပူးပေါင်းတပ်ကတိုက်ခိုက်၍စစ်ကောင်စီတပ်မှသေဆုံးဒဏ်ရာရမှုများ

●မျက်မြင်​တွေရှိရ​သော စစ်​သားအ​လောင်း၃၀ခန့်ရှိပြီး ဒဏ်ရာရသူများပြားဟုPDF တစ်ဦးပြော၊ Banmauk Revolutionက စစ်​သား၆၁ ဦး​သေဟု​ဖော်ပြ

စစ်ကိုင်းတိုင်း ဗန်းမောက်မြို့နယ်တွင်ယမန်နေ့(ဇွန် ၂၃)ကစစ်ကောင်စီတပ်ကို ကချင်လွတ်လပ်​ရေးတပ်မ​တော်(KIA) နှင့် ပြည်သူ့ကာကွယ်​ရေးတပ်တို့ကပူး​ပေါင်းတိုက်ခိုက်ရာ စစ်​ကောင်စီတပ်သေဆုံး၊ဒဏ်ရာရရှိမှုများပြား​ကြောင်း ​ဒေသတွင်းသတင်းရင်းမြစ်များက ​ပြောသည်။

ဇွန်လ ၂၃ရက်က ဗန်းမောက်မြို့နယ်မင်းကုန်းရွာနှင့် ရွာသာယာ ကြား တွင် စစ်ကောင်စီတပ်ကို ကချင်လွတ်လပ်ရေးတပ်မတော်(KIA)နှင့် ကသာခရိုင် တပ်ရင်းများဖြစ်သည့် ဗန်းမောက် ပြည်သူ့ကာကွယ်ရေးတပ်(ဗန်း​​မောက်-PDF)၊ အင်းတော်ပြည်သူ့ကာကွယ်​ရေးတပ်(အင်း​တော်- PDF) တို့ က ပူးပေါင်းတိုက်ခိုက်ခဲ့ခြင်းဖြစ်သည်။

“ရန်သူ(စစ်ကောင်စီတပ်)တပ်က အင်အား ဘယ်လောက်နဲ့ ဆင်းလာတယ်ဆိုကို သတင်း အတိအကျ ရတာနဲ့ ဗျူဟာကောင်းကောင်းချပြီး နှစ်ဖွဲ့ ညှပ်တိုက်တာ။သေတာကမျက်မြင် အရ ၃၀ လောက်ရှိတယ်။ဒဏ်ရာရတဲ့သူက ပိုများတယ်။သူတို့ (စစ်​ကောင်စီတပ်)ဘက် အကျ များတော့ မနေ့က လက်နက်ကြီး ကြီးပဲ အလုံး ၅၀ ကျော်လောက်သုံးတယ်။ကျွန်တော်တို့လက်နက်ကောက်ဖို့မစောင့်တော့ဘဲအန္တရာယ်ကင်းအောင်ပဲဆုတ်လိုက်တယ်”ဟု အင်းတော် PDF တပ်ဖွဲ့ဝင်တစ်ဦးက လူထုနွေဦးသို့ ပြောသည်။

အဆိုပါ တိုက်ခိုက်မှုအတွင်း စစ်ကောင်စီတပ်က ၆၁ ဦးသေဆုံးပြီး အများအပြား ဒဏ်ရာရရှိခဲ့ကြောင်း၊ စစ်ကောင်စီတပ်များ အလောင်းများပင် မကောက်နိုင်ဘဲထွက်ပြေးသွား၍ ဒေသကာကွယ်ရေး တပ်များက သင်္ဂြိုလ်ပေးခဲ့ရကြောင်းဗန်း​​မောက်​​ဒေသတွင်း စစ်​ရေးသတင်းများ​ဖော်ပြ​ပေး​နေ​သော Banmauk Revolution ကဖော်ပြထားသည်။ သို့ရာတွင် လက်နက်ခဲယမ်း ရရှိမှုနှင့် တိုက်ပွဲဖြစ်စဉ်နှင့်ပတ်သက်သည့် ဓာတ်ပုံများ ထုတ်ပြန်ဖော်ပြခြင်းမပြုသေးပေ။ အဆိုပါ တိုက်ပွဲ၌ PDF ရဲဘော် ၁ဦး ဒဏ်ရာရရှိခဲ့ကြောင်း ထုတ်ပြန်ထားသည်။ သို့​သော်People’s Spring ကစစ်​ကောင်စီတပ်​သေဆုံးမှုအ​ရေအတွက်ကိုသီးခြားအတည်မပြုနိုင်ပါ။

စစ်ကိုင်းတိုင်း ဒေသခံတစ်ဦးက ဗန်းမောက်တိုက်ပွဲဖြစ်စဉ် အသေးစိတ်မသိရသေးသော်လည်း အင်းတော် – ဗန်းမောက်လမ်းပိတ်ထားကြောင်း ကြေညာထား၍ စစ်ရေးအခြေအနေ ပြင်းထန်သည့် သဘောရှိကြောင်း ပြောသည်။

“အင်းတော်နဲ့ ဗန်းမောက်ကြားကိုတော့ လမ်းပိတ်ထားတယ်ကြားတယ်။ ပြင်းထန်တဲ့ သဘောတော့ရှိတယ်။နောက်ဆက်တွဲသတင်းတော့မသိရသေးဘူး” ဟု ၎င်းက​ပြောသည်။

ရွာသာယာအနီးတွင် လွန်ခဲ့​သောတစ်ပါတ်ခန့်မှစ၍ တိုက်ပွဲ ဖြစ်ပွား​နေပြီး လမ်းများပိတ်ထားကာ မည်သူမျှ မသွားရဲသဖြင့် တိုက်ပွဲအ​ခြေအ​နေကိုမူ မသိ​ကြောင်းဗန်း​မောက်မြို့မှ အခြား​ဒေသခံတစ်ဦးကလည်း​ပြောသည်။

စစ်ကိုင်းတိုင်း အင်းတော် – ဗန်းမောက် ကားလမ်းကို ယနေ့ (ဇွန်လ၂၄ရက် )နံနက်မှ ဇွန်လ ၂၅ရက် နံနက် ၆နာရီအထိ သုံးဘီး၊ ဆိုင်ကယ်၊ ကား စသည့် မည်သည့် ယာဉ်မှဖြတ်သန်းခြင်းမပြုရန် ဒေသခံပြည်သူ့ကာကွယ်ရေးတပ်ဖွဲ့မှ အရေးပေါ် ထုတ်ပြန်ကြေညာထားသည်။