●စစ်ကောင်စီတပ်က အဆိုပါပစ်ခတ်မှုကို PDF ကလက်လုပ်စိန်ပြောင်ဖြင့်ပစ်ခတ်ခြင်းဟုသတင်းလိမ်လည်ဖြန့်ချီ
စစ်ကိုင်းတိုင်း၊ ချောင်းဦးမြို့နယ်တွင်လက်နက်ကြီးဖြင့်ပစ်ခတ်ခံရမှုကြောင့် သားအမိ နှစ် ဦးသေဆုံးခဲ့ရသည့် ဖြစ်စဥ်တွင်စစ်ကောင်စီတပ်က ၆၀မမ ဗုံးသီးများဖြင့် ပစ်ခတ်ခဲ့ခြင်းဖြစ်ကြောင်း ဒေသတွင်းသတင်းရင်းမြစ်များက ပြောသည်။
ချောင်းဦးမြို့တွင် တပ်စွဲထားသောအကြမ်းဖက်စစ်ကောင်စီတပ်သည် ဇွန် ၂၃ ရက် ည (၉) နာရီအချိန်ခန့်တွင် ချောင်းဦးမြို့ပေါ်ရှိ ရပ်ကွက်များဆီသို့ လက်နက်ကြီးများဖြင့် (၇) ချက်ခန့် ပစ်ခတ်ခဲ့သည်။ ထိုသို့ပစ်ခတ်မှုကြောင့် တမာမြိုင်ရပ်ကွက်၊ ကျောင်းရွာရပ်ရှိ နေအိမ်တစ်လုံး၏ နွားစာတိုက်ပေါ်သို့ တစ်လုံး၊ တမာမြိုင်ရပ်ကွက် အနောက်မအုပ်ရပ်ရှိ နေအိမ်များအနီးသို့နှစ်လုံး ကျရောက်ပေါက်ကွဲခဲ့သည်။
ကျောင်းရွာရပ်ကွက်သို့ ကျရောက်ပေါက်ကွဲသော လက်နက်ကြီးကြောင့် အသက် (၅၀) နှစ်အရွယ်ရှိ ဒေါ်ထားထားနွယ် (ခ) ဒေါ်ပေါက် နှင့် ၎င်း၏သမီးဖြစ်သူ အသက် (၂၄) နှစ်အရွယ်ရှိ မဝါဝါမိုး (Non CDM စည်ပင်သာယာဝန်ထမ်း) တို့ သေဆုံးခဲ့ပြီး မဝါဝါမိုး၏ ဖခင်ဖြစ်သူမှာ ဒဏ်ရာရရှိပြီးဆေးကုသမှုခံယူနေရကြောင်းဒေသခံများကပြောသည်။
အကြမ်းဖက်စစ်ကောင်စီသည် ထိုဖြစ်စဥ်အားပြည်သူ့ကာကွယ်ရေးတပ်များက ချောင်းဦးမြို့၊ တမာမြိုင်ရပ်ကို လက်လုပ်စိန်ပြောင်းဖြင့်ပစ်ခတ်သောကြောင့် ပြည်သူ (၂) ဦးသေဆုံးပြီး (၄) ဦးဒဏ်ရာရရှိသည်ဟု သတင်းအမှားများ လိမ်လည်ထုတ်ပြန်ခဲ့သည်။
သို့သော်ထိုညကပစ်ခတ်ခဲ့သောဗုံးသီးအခွံများမှာလက်လုပ်စိန်ပြောင်းဗုံးသီးများမဟုတ်ဘဲ အကြမ်းဖက်စစ်ကောင်စီအသုံးပြုသော ၆၀မမ ဗုံးသီးများဖြစ်နေသည်ကိုတွေ့ရှိရပြီး မြို့ခံလူထုကလည်း အကြမ်းဖက်စစ်ကောင်စီများ တပ်စွဲထားရာနေရာမှ ပစ်ခတ်ခြင်းဖြစ်ကြောင်း အခိုင်အမာပြောဆိုထားကြောင်းချောင်းဦးမြို့နယ်ပြည်သူ့သတင်းက ဓါတ်ပုံများနှင့်တစ်ကွဖော်ပြသည်။
ကျောင်းရွာရပ်ကွက်ရှိ ပြည်သူနေအိမ်(၄)လုံးလည်းလက်နက်ကြီးစ ထိမှန်ပျက်စီးခဲ့သည်။အနောက်မအုပ်ရပ်ကွက်ရှိ နေအိမ်များအနီးကျရောက်ပေါက်ကွဲခဲ့သော လက်နက်ကြီးကျည် (၂) လုံးကြောင့်လည်း နေအိမ် (၆) လုံး ထိမှန်ခဲ့ပြီး ဝမ်းဗိုက်ပွင့်ထွက်ဒဏ်ရာရရှိသူ (၁) ဦး အပါအဝင် ပြည်သူ (၃) ဦး ထိခိုက်ဒဏ်ရာ ရရှိခဲ့သည်။
ထိခိုက်ဒဏ်ရာရရှိသူများကို အကြမ်းဖက်စစ်ကောင်စီတပ်များက အနောက်မြောက်တိုင်းစစ်ဌာနချုပ် (နမခ) သို့ခေါ်ဆောင်သွားခဲ့ပြီး သေဆုံးသူ သားအမိ (၂) ဦးကို ယမန်နေ့နေ့လယ် (၂) နာရီအချိန်တွင် သင်္ဂြိုလ်ခဲ့သည်။
