စစ်ကိုင်းတိုင်း၊ ချောင်းဦးမြို့နယ်တွင် အကြမ်းဖက်စစ်အုပ်စုအား ၁၀ရက်အတွင်း လေးကြိမ်တိုက်ခိုက်ရာ စစ်ကောင်စီတပ်သား ငါးဦးသေဆုံးကြောင်း ချောင်းဦးမြို့နယ် ပြည်သူ့ကာကွယ်ရေးတပ်ဖွဲ့(CHU PDF)က သတင်းထုတ်ပြန်သည်။
ပြီးခဲ့သည့် ဇွန်လ ၂၃ ရက် နံနက်ပိုင်းက ချောင်းဦးမြို့နယ်၊ အောင်ချမ်းသာရွာအနီး၌ လမ်းသွားလမ်းလာများအား ခြိမ်းခြောက်ငွေညှစ်နေသော အကြမ်းဖက်အုပ်စုကို တပ်ခွဲ (၁)က မိုင်းခွဲတိုက်ခိုက်ခဲ့ရာ အကြမ်းဖက်စစ်သားတစ်ဦး သေဆုံးခဲ့သည်ဟု ချောင်းဦး PDF၏ ထုတ်ပြန်ချက်တွင် ဖော်ပြသည်။
ဇွန်လ ၂၅ ရက် ညပိုင်းတွင်လည်း ချောင်းဦးမြို့ပေါ်သို့ ထွက်လာသော အကြမ်းဖက်အုပ်စုကို တပ်ခွဲ (၄)မိုင်းတပ်ခွဲက မိုင်းခွဲတိုက်ခိုက်ခဲ့ရာ အကြမ်းဖက်စစ်သား လေးဦး ဒဏ်ရာရရှိခဲ့သည်ဟု ချောင်းဦး PDFက ဆိုသည်။
ဇွန်လ ၂၇ ရက် ညနေ၅နာရီခွဲခန့်တွင် ချောင်းဦးပြည်သူ့အားကစားကွင်းအနီးရှိ အကြမ်းဖက်စစ်သား သုံးဦးကို တပ်ခွဲ(၄)မိုင်းတပ်ခွဲက မိုင်းနှစ်လုံးခွဲကာ တိုက်ခိုက်ခဲ့ရာ အကြမ်းဖက်စစ်သားတစ်ဦးသေဆုံး၍ သုံးဦးထိခိုက်ဒဏ်ရာ ရရှိခဲ့ကြောင်း ချောင်းဦး PDF၏ ထုတ်ပြန်ချက်တွင် ဖော်ပြသည်။
ယမန်နေ့ (ဇူလိုင်လ ၂ ရက်).ညနေ၅နာရီခန့်တွင်လည်း ချောင်းဦးမြို့တွင်းတစ်နေရာရှိ အကြမ်းဖက်စစ်ကောင်စီတပ်ကို တပ်ခွဲ (၃) ရဲဘော်များက မိုင်းခွဲတိုက်ခိုက်ခဲ့ရာ အကြမ်းဖက်စစ်သားသုံးဦး သေဆုံးခဲ့သည်ဟု ဆိုသည်။
အထက်ပါဖြစ်စဥ်များတွင် စုစုပေါင်း အကြမ်းဖက်စစ်သား ငါးဦးသေဆုံးပြီး ပြည်သူ့ရဲဘော်များ အန္တရာယ်ကင်းစွာ ဆုတ်ခွာနိုင်ခဲ့ကြောင်း ချောင်းဦး PDF က အသိပေးသည်။
ဇွန်လ၂၇ရက်ဖြစ်စဥ်တွင် ပြည်သူနှစ်ဦးနှင့် ဇူလိုင်၂ ရက်နေ့ဖြစ်စဥ်တွင် ပြည်သူတစ်ဦးတို့ မတော်တဆထိခိုက်မိသည်ဟု သိရှိရပြီး စိတ်မကောင်းခြင်းများဖြင့် တောင်းပန်အပ်ကြောင်း ချောင်းဦး PDF၏ ထုတ်ပြန်ချက်တွင် ရေးသားသည်။
ပြည်သူများအနေဖြင့် အကြမ်းဖက်စစ်တပ်နှင့်နီးကပ်စွာ နေထိုင်ခြင်းမပြုရန် ချောင်းဦးမြို့နယ် ပြည်သူ့ကာကွယ်ရေးတပ်ဖွဲ့ CHU PDFက မေတ္တာရပ်ခံသည်။
အထက်ပါဖြစ်စဥ်များနှင့်ပတ်သက်၍ အကြမ်းဖက်စစ်သားထိခိုက်သေဆုံးမှုများနှင့်ပတ်သက်၍ ထပ်မံအတည်ပြုနိုင်ခြင်းမရှိသေးပါ။ ချောင်းဦး PDF သို့လည်း ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပေ။
ချောင်းဦးမြို့နယ်သည် အကြမ်းဖက်စစ်ကောင်စီအား ခုခံတိုက်ခိုက်မှုအားကောင်းရာ ဒေသတစ်ခုဖြစ်ပြီး ဒေသတွင်း အခြား PDFအဖွဲ့များနှင့်လည်း ပူးပေါင်းတော်လှန်နေကြသည်။
