မန္တလေးမြို့ နိုင်ငံခြားဘာသာတက္ကသိုလ်(MUFL)ဝင်းအတွင်း တပ်စွဲထားသော စစ်ကောင်စီတပ်ကို ဗုံးပစ်တိုက်ခိုက်ခဲ့ကြောင်း မြို့ပြပြောက်ကျားတပ်ဖွဲ့ Generation Z Power(Mandalay)က အသိပေးထုတ်ပြန် သည်။
ယမန်နေ့(ဇူလိုင် ၁၀)ညနေ ၅ နာရီခွဲခန့်က မန္တလေးမြို့ ၆၂ လမ်း၊ ၂၂ လမ်းနှင့် ၂၃ လမ်းကြားရှိ MUFL ကျောင်းတွင် တပ်စွဲထားသော စစ်ကောင်စီတပ်သားများကို GZP (Mandalay)မှ ဗုံးနှစ်လုံးဖြင့် ပစ်ခတ်တိုက် ခိုက်ခဲ့ခြင်းဖြစ်ကြောင်း ဖော်ပြသည်။
အဆိုပါတိုက်ခိုက်မှုတွင် စစ်ကောင်စီတပ်ဘက်မှ ထိခိုက်ဒဏ်ရာရသူများနိုင်ပြီး တက္ကသိုလ်ဝန်းအတွင်းသို့ အရေးပေါ်လူနာ တင်ကားအချို့ ဝင်ထွက်သွားလာသည်ကို မြင်တွေ့ရကြောင်း ဒေသခံများက ဆိုသည်။
“စကစကို ထောက်ခံအားပေးလက်တွဲနေတဲ့ လူပုဂ္ဂိုလ်၊ လုပ်ငန်း၊ အဖွဲ့အစည်းစတဲ့ ဘယ်အရာမဆို ရသမျှနည်းနဲ့တိုက်ထုတ်သွားနေတာ ဖြစ်တဲ့အတွက် အခုလို တိုက်ခိုက်မှုတွေကို လုပ် ဆောင်နေတာပါ။ စကစ မပြုတ်သရွေ့ တိုက်ထုတ်နေမှာပါပဲ”ဟု GZP (Mandalay)မှ ရဲဘော်တစ်ဦးက မှတ်ချက်ပေးသည်။
အထက်ပါ MUFL ကျောင်းတွင် တပ်စွဲထားသည့် အကြမ်းဖက်စစ်ကောင်စီတပ်များ ယခုအကြိမ်တိုက်ခိုက်ခံရမှုသည် ဒုတိယအကြိမ်ဖြစ်ပြီး ပြီးခဲ့သည့် ဇွန်လ ၂၁ ရက်ကလည်း ဗုံးပစ်တိုက်ခိုက်ခံခဲ့ရသေးသည်။
