မလွှဲသာ၍ ခရီးသွားရပါက ဆက်သွယ်ရေးကိရိယာများကို စနစ်တကျ ရှင်းလင်းထားရန် ဖော်ပြ
စစ်ကောင်စီတပ်သည် တိုက်ပွဲများ၌ ၎င်းတို့ရှုံးနိမ့်ပါက ပြည်သူလူထုကို အငြိုးအတေးကြီးမားစွာ ရက်စက်သောလုပ်ရပ်များ လုပ်လေ့လုပ်ထရှိ၍ ပြည်သူများ အနေဖြင့် နာရေး ၊ ကျန်းမာရေး သေရေးရှင်ရေးမှ လွဲ၍ မလွှဲမရှောင် သာသည့် အခြေအနေများတွင်သာ ခရီးသွားလာကြရန် ရက္ခိုင့်တပ်တော်(AA)က ထုတ်ပြန်သည်။
ပြီးခဲ့သည့် ရက်ပိုင်းက မောင်တောမြို့နယ် တိုက်ပွဲ၌ AA ၏တိုက်ခိုက်မှုကြောင့် စစ်ကောင်စီတပ်မှ ၂၀ခန့်သေဆုံးပြီး ရဲမှူးအပါအဝင် ၁၄ဦး အရှင်ဖမ်းဆီး ခံခဲ့ရသည့် ဖြစ်စဥ် ဖြစ်ပွားခဲ့ရာ AAက ယနေ့တွင် ပြည်သူသို့ အသိပေး ထုတ်ပြန်ကြေညာချက်အား ရခိုင်ဘာသာဖြင့် ထုတ်ပြန်ခဲ့သည်။
အကယ်၍ မတက်သာ၍ ခရီးသွားလာရမည်ဆိုပါက ကွန်ပျူတာ၊ ဖုန်း၊ Tablet စသည့် ဆက်သွယ်ရေး ကိရိယာများကို စနစ်တကျရှင်းလင်းပြီးမှ သွားလာ ကြရန် နှင့် ညဉ့်အချိန်များ၌ လုံခြုံရေးသတိဖြင့် အိပ်စက်ကြရန် အသိပေး ထားသည်။
စစ်ကောင်စီမှ ဖမ်းဆီးတရားစွဲတင်နိုင်လောက်သည့်အထောက်အထားများ ဖြစ်စေမည့် အမှတ် အသား သင်္ကေတများထားရှိမှုကို အထူးသတိပြုကြရန် AAက အလေးအနက် တိုက်တွန်းထားသည်။
