မွန်ပြည်နယ်၊ ရေးမြို့နယ်ရှိ တံတားကြီးထိပ်မှ စစ်ကောင်စီတပ်စစ်ဆေးရေးဂိတ်ကို ဝင်ရောက်ပစ်ခတ်ပြီး ကွပ်မျက်ခံရသူများအတွက် သွေးကြွေးတောင်းခဲ့ကြောင်း မွန်ပြည်နယ်အခြေပြုတော်လှန်ရေးအဖွဲ့အစည်း MSROက ယနေ့(ဇူလိုင် ၂၇) အသိပေးထုတ်ပြန်သည်။
ယနေ့နံနက် ၇ နာရီခန့်က ရေးမြို့ တံတားကြီးထိပ်မှ စစ်ကောင်စီတပ် စစ်ဆေးရေးဂိတ်ကို အနီးကပ်ဝင်ရောက်ပစ်ခတ်ခဲ့ခြင်းဖြစ်ပြီး စစ်ကောင်စီတပ်မှ တစ်ဦးသေဆုံးကြောင်း ဖော်ပြသည်။
“ဂိတ်အတွင်း အနီးနားထိသွားပြီး ပစ်ခတ်ခဲ့ပါတယ်။ မနေ့ကတည်းက ဆင်းသွားတာ ပစ်ခွင့်မသာလို့ ဒီနေထပ်ဆင်းပြီး လုပ်တာပါ”ဟု MSRO မှ တော်လှန်ရေးရဲဘော်တစ်ဦးက ပြောသည်။
အထက်ပါစစ်ဆင်ရေးသည် ကိုဂျင်မီ၊ ကိုဇေယျာသော်နှင့် ကျဆုံးသူရဲကောင်းများအတွက် သွေးကြွေးပြန်တောင်းသည် Mission No.1 ဖြစ်ကြောင်းလည်း MSRO က အသိပေးသည်။
တံတားကြီးထိပ်မှ စစ်ဆေးရေးဂိတ်အားဝင်ရောက်ပစ်ခတ်တိုက်ခိုက်စဥ် အကြမ်းဖက်စစ်ကောင်စီတပ်မှ ပြန်လည်ခုခံပစ်ခတ်နိုင်ခြင်းမရှိခဲ့ကြောင်း MSRO ထံမှ သိရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)