စစ်ကိုင်းတိုင်း၊ မြင်းမူမြို့နယ်၊ မူးမြစ်နံဘေးရှိ ကျေးရွာများအား ဝင်ရောက် ဖျက်ဆီး သတ်ဖြတ်နေသော အကြမ်းဖက်စစ်ကောင်စီတပ်အား ဒေသတွင်း ပူးပေါင်းအဖွဲ့က ဝင်ရောက်တိုက်ခိုက်ရာ စစ်ကောင်စီတပ်သား ၁၁ဦးခန့်သေဆုံး ကြောင်း GTR MMU အဖွဲ့က ထုတ်ပြန်သည်။
ဇူလိုင် ၃ဝ ရက် နံနက် ၁၁နာရီခန့်က မြင်းမူမြို့နယ်ရှိ မူးမန္တလေးရွာ နှင့် အင်းမကျေးရွာတို့အား မီးရှို့ဖျက်ဆီးပြီး ပြန်လာသည့် အကြမ်းဖက်စစ်ကောင်စီ တပ်သည် ဂုံညှင်းဆိပ်ကျေးရွာထဲသို့ ဝင်ရောက်ဖျက်ဆီးစဥ် ဒေသတွင်းအဖွဲ့များ နှင့် တိုက်ပွဲဖြစ်ပွားခဲ့ခြင်းဖြစ်သည်။
ဒေသတွင်းမဟာမိတ်အဖွဲ့များက ဂုံညှင်းဆိပ်ရွာအတွင်းထိ ဝင်ရောက်တိုက်ခိုက် ခဲ့ကြခြင်းဖြစ်ပြီး တိုက်ပွဲကြာချိန် ၁ နာရီခန့်အတွင်း စစ်ကောင်စီတပ်သား ၁ဝ ဦးခန့်သေဆုံးကာ အများအပြားထိခိုက်ဒဏ်ရာရရှိခဲ့သည်ဟု ဆိုသည်။
အဆိုပါတိုက်ပွဲတွင် GTR MMU၊ စစ်ကိုင်းခရိုင်တပ်ရင်း (၂)၊ MMDF၊ မြင်းခြံခရိုင် တပ်ရင်း(၆) စသည့်မဟာမိတ်တပ်များက ပူးပေါင်းတိုက်ခိုက် ခဲ့ကြခြင်းဖြစ်ပြီး မဟာမိတ်တပ်များ အထိအခိုက် မရှိ ဆုတ်ခွာနိုင်ခဲ့ကြောင်း ၎င်းတို့က အသိပေးသည်။
ဖြစ်စဥ်နှင့်ပတ်သက်ပြီး GTRMMU အဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။ ထို့အပြင် အကြမ်းဖက်စစ်ကောင်စီတပ်၏ ထိခိုက်သေဆုံးမှုအခြေအနေနှင့် ပတ်သက်၍ People’s Springက ထပ်မံအတည်ပြုနိုင်ခြင်းမရှိသေးပေ။
စစ်ကောင်စီတပ်သည် စစ်ကိုင်းနှင့် မြင်းမူမြို့နယ် မူးမြစ်နံဘေးရှိ ကျေးရွာများ ကို ဇူလိုင်၂၇ရက် ကစတင်ကာ ရဟတ်ယာဥ်များဖြင့်ပါ ပစ်ခတ်ဝင်ရောက်ခဲ့ သည်။
ဇူလိုင် ၂၈ ရက် နံနက်ပိုင်းတွင် မူးမန္တလေးကျေးရွာက လေးဦးထက်မနည်း ဖမ်းဆီးသတ်ဖြတ်ခဲ့ပြီး အိမ်ပေါင်း ၂၀ ခန့် မီးရှို့ဖျက်ဆီးခံခဲ့ရသည်။
အလားတူ စစ်ကိုင်းမြို့နယ် ညောင်ပင်ရှည်ရွာ အိမ်ခြေ ၆၀ ကျော်၊ တလိုင်းကျွန်း ရွာ အိမ်ခြေ၅၀ ကျော်ကိုလည်း အကြမ်းဖက်စစ်တပ်က မီးရှို့ဖျက်ဆီးခဲ့သည်။
