စစ်ကိုင်းတိုင်း၊ ရွှေဘိုမြို့နယ်တွင် ယမန်နေ့တစ်ရက်တည်း ကျေးရွာအုပ်ချုပ် ရေးမှူးနှစ်ဦး ပစ်ခတ်ရှင်းလင်းခံခဲ့ရကြောင်း ဒေသခံများက ပြောသည်။
ယမန်နေ့ (ဇူလိုင် ၃၁ရက်) မွန်းလွဲ ၁နာရီခွဲခန့်က ရွှေဘိုမြို့နယ်၊ ချောင်းဆုံရွာက စစ်ကောင်စီခန့် အုပ်ချုပ်ရေးမှူးဦးညွှန့်ဝင်းဆိုသူအား အမည်မသိ အဖွဲ့တစ်ဖွဲ့က ၎င်းနေအိမ်သို့ ဝင်ရောက်ပစ်ခတ် ရှင်းလင်းသွားကြောင်း ဒေသခံများက ပြောသည်။
ယမန်နေ့ည ၇နာရီ ၅၀မိနစ်ခန့်ကလည်း ရွှေဘိုမြို့နယ်၊ တဂနန်းကျေးရွာရှိ အုပ်ချုပ်ရေးမှူးဟောင်း ပျူစောထီးအဖွဲ့ဝင်ဟုဆိုသူ လောင်းကစားဒိုင် ဦးဝင်းမြိုင်ဆိုသူအား တဂနန်းရွာ တောသွားလမ်းပေါ်တွင် အမည်မသိအဖွဲ့ တစ်ဖွဲ့က သေနတ်ဖြင့်ပစ်ခတ်သွားကြောင်း ဒေသခံများက ပြောသည်။
ပစ်ခတ်ခံရသည့် အုပ်ချုပ်ရေးမှူးနှင့် အုပ်ချုပ်ရေးမှူးဟောင်းတို့ အသက်သေဆုံး ခြင်းရှိ၊မရှိ အတည်မပြုနိုင်သေးပေ။ ထို့အပြင် ၎င်းတို့နှစ်ဦးအား မည်သည့်အဖွဲ့ က ရှင်းလင်းခဲ့သည်ကို မသိရသေးပေ။
ရွှေဘိုခရိုင် ပြည်သူ့ကာကွယ်ရေးအဖွဲ့က ရွှေဘိုခရိုင်အတွင်း အာဏာသိမ်း အကြမ်းဖက်စစ်ကောင်စီ လက်အောက်တွင် တရားမဝင်တာဝန်ထမ်းဆောင် လျက်ရှိသည့် အဆင့်ဆင့်သော အုပ်ချုပ်ရေး တာဝန်ယူနေသူအားလုံး ၁၀ ရက်အတွင်း ရာထူးနှင့် တာဝန်ကျရာနယ်မြေမှ စွန့်ခွာကြရန် ဇူလိုင် ၁၈ ရက်တွင် သတိပေးကြေညာချက်ထုတ်ပြန်ထားသည်။
ပြီးခဲ့သည့် ဧပြီအတွင်းကလည်း ရွှေဘိုမြို့နယ်၊ တအုံကျေးရွာ၏ စစ်ကောင်စီ ခန့်အုပ်ချုပ်ရေးမှူးနှင့် ပျူစောထီးတစ်ဦးအား ဒေသတွင်း PDFအဖွဲ့တစ်ဖွဲ့က ပစ်ခတ်ရှင်းလင်းခဲ့သေးသည်။
