ချင်းပြည်နယ်ပလက်၀ မြို့နယ်တွင် ရက္ခိုင့်တပ်တော်(AA)နှင့် စစ်ကောင်စီတပ်တို့ ယခုဩဂုတ်လဆန်းပိုင်း၌ တိုက်ပွဲ ဆက်တိုက်ဖြစ်ပွားနေကြောင်း ပလက်၀ ဒေသခံတစ်ဦးက ပြောသည်။
“နပဒါ ကျေးရွာမှာ ဘုရားကုန်းရှိတယ်။ အဲဒီအနီးတဝိုက်မှာ သူတို့(စစ်ကောင်စီတပ်) နေရာယူထားတယ။ နပဒါ ကျေးရွာ အုပ်စု ထဲက ကျေးရွာတွေရှိတယ်။ အဲဒီ ရွာအနီးတဝိုက်ဖြစ်တာ” ဟု ဒေသခံက ပြောသည်။
ပလက်၀ မြို့နယ် နှပဒါကျေးရွာအုပ်စုအတွင်း ကုလားတန်မြစ်အရှေ့ဘက်ခြမ်း၌ တိုက်ပွဲဖြစ်ပွားနေပြီး နှစ်ဖက်ထိခိုက်ကျဆုံးအခြေအနေများကို မသိရဟု ၎င်းက ဆိုသည်။
“မြစ်အရှေ့ဘက်ခြမ်းမှာရှိတဲ့နေရာမှာတွေက တပ်နေရာတွေ အရှေ့ဘက်ခြမ်းတွေမှာပဲဖြစ်တယ်။ AAနဲ့ စစ်တပ်နဲ့ ဖြစ်တာက အရှေ့ဘက်ခြမ်းတွေမှာပဲ ဖြစ်တာ။ ၁ရက်နေ့ကတည်းကတိုင် ဖြစ်နေပြီ။ ဖြစ်နေပြီး တပ်ဘက်က နည်းနည်း အကျအဆုံးများတယ်လို့ ကြားရတယ်။ ဒါကတော့ အသေအချာမသိဘူး” ဟု ပလက်၀ ဒေသခံက ပြောသည်။
အဆိုပါ တိုက်ပွဲဖြစ်ပွားရာဒေသတွင်ဩဂုတ် ၂ရက်က ကျောင်းသားကျောင်းသူများ ပါသည့် စက်လှေ ကို စစ်ကောင်စီတပ်က ပစ်ခတ်ခဲ့ရာ ကျောင်းသား ၂ဦး သေဆုံးခဲ့သည်ဟု ဆိုသည်။
“အခုဟာက နှစ်ဖက် ထိပ်တိုက်ဖြစ်တဲ့အချိန် မတော်တဆ ထိသွားတာမျိုးမဟုတ်ဘဲနဲ့ ရည်ရွယ်ပြီးမှတောင် ပစ်တယ်လို့ ရန်သူလို သဘောထားပြီးမှ ပစ်တယ်လို့ သုံးသပ်ချင်တဲ့ အနေအထားရှိနေတယ်။ အဲဒီနေရာမှာကလည်း တပ်ပဲ အခြေချထားတာ။ အဲဒီတော့ သူတို့က လူထုသွားတဲ့ လှေကို ဘာမှ ကြိုတင် အသိပေးခြင်းမရှိဘဲနဲ့ ဒီလိုမျိုး ပစ်ခတ်မှု လုပ်ရပ်ဆိုတာက မဖြစ်သင့်ဘူး” ဟုလည်း ဒေသခံက ပြောကြားသည်။
ယနေ့ ဩဂုတ် ၄ရက်နေ့အထိ ပစ်ခတ်မှုများ ရှိသည်ဟု သတင်းကြားရသော်လည်း အတိအကျ မသိရဟု ၎င်းကဆိုသည်။
“သူတို့က ထပ်ပြီး ဖြစ်ဖို့ ရှိတယ်ဆိုတာကတော့ အင်အားတွေဖြည့်နေကြတယ်လို့ ကြားတယ်” ဟု ပလက်၀ ဒေသခံက ပြောသည်။
