ရေတွင်းကုန်းရွာသား​တွေဖြတ်သန်းခဲ့ရတဲ့ငရဲခန်း

-ဒလပန်းရေးသားသည်။

“ လေယာဥ်ကြဲလို့ သေခဲ့ရတဲ့ ဗိုက်ကြီးသည်ဆို ကလေးက ဗိုက်ပေါက်ပြီး လက်တောင်ထွက်နေတာ“

ညောင်​လေးပင်မြို့နယ်မှာ စစ်တပ်ရဲ့ အစုလိုက်အပြုံလိုက်သတ်ဖြတ်မှုကြောင့် ကိုယ်ဝန်​ဆောင်မိခင်​သေဆုံးခဲ့တာကိုမျက်မြင်ကြုံတွေ့ခဲ့တဲ့ ရေတွင်းကုန်းရွာသားတစ်ဦးက ပြန်ပြောပြနေတာပါ။

အာဏာသိမ်းစစ်တပ်ရဲ့ တပ်မ (၇၇)လက်​အောက်ခံတပ်​ရင်း​တွေဖြစ်တဲ့ ခမရ – ၂၀ ၊ ပိန်းဇလုတ်အခြေစိုက် ခလရ – ၂၆၄ ၊ ခမရ – ၄၃၉ ပူးပေါင်းထားတဲ့ စစ်တပ်စစ်ကြောင်းက မတ်လ ၅ ရက် နံနက် ၃ နာရီဝန်းကျင်ကစလို့ရေတွင်းကုန်းကျေးရွာဘက်ကို အင်အား ၄၀၀ ကျော်နဲ့ စတင်စစ်ကြောင်းထိုး ခဲ့တာပါ။

အဲ့ဒီနေ့ဟာ ရေတွင်းကုန်းနဲ့ အနီးနားက ကျောင်းကုန်းဒေသခံတွေအတွက် ကြမ္မာဆိုးငင်တဲ့ နေ့တစ်ရက်ပါပဲ။ ရုတ်တရက် စစ်တပ်စစ်ကြောင်းထိုးဝသ်လာပြီး အကြမ်းဖက်တာကြောင့် ရေတွင်းကုန်းဒေသခံဟာတွေဟာ မျက်နှာတောင်သစ်ချိန်မရဘဲ ပြေးမိပြေးရာကို ပြေးကြရပါတော့တယ်။

အဲ့ဒီထဲ အသက် ၅၀ ဝန်းကျင်ရှိပြီးတဲ့ ကိုမောင် ( အမည်လွှဲ) တို့မိသားစုလည်း ပါဝင်ပါတယ်။ကို​မောင် အပါအဝင် အဖြစ်ဆိုးကိုကြုံခဲ့ရတဲ့ပြည်သူ​တွေဟာ လုံခြုံ​ရေး​​ကြောင့်သူတို့အမည်ရင်းကို​မ​ဖော်ပြ​စေလိုပါဘူး ။ကိုမောင် တို့မိသားစုဟာ လယ်ယာလုပ်ပြီး ဘဝကို အေးချမ်းစွာဖြတ်သန်းနေတဲ့ မိသားတစုပါ။ကိုမောင်မှာဇနီးသည် အပါအဝင် တစ်နှစ်ခွဲကလေးငယ် ၊ သမီး နဲ့ သား စုစုပေါင်း မိသားစုဝင် ၅ ဦးရှိပါတယ်။

စစ်ကြောင်းထိုးလာတာ​ကြောင့်ကိုမောင်တို့မိသားစုဟာ မိသားစုကို လက်ဆွဲပြီး ​ဘေးလွတ်မယ်ထင်တဲ့ဘက်ကိုထွက်ပြေးပါ​တော့တယ်။

သူတို့မိသားစုလိုပဲ ရေတွင်းကုန်းရွာကတခြား ဒေသခံ​တွေဟာလည်း အသက်ဘေးလွတ်​​အောင်ထွက်ပြေးကြပါတယ်။အရင်က အေးချမ်းသာယာတဲ့ ရေတွင်းကုန်ရွာအုပ်စု ကလေးဟာ တမဟုတ်ချင်း စစ်တပ်ရန်ကလွတ်​အောင်ထွက်​ပြေးသူ​တွေနဲ့ ဝရုန်းသုန်းကားဖြစ်သွားပါတယ်။

ဒါ​ပေမယ့် စစ်တပ် စစ်ကြောင်း​တွေက ပြည်သူတွေ ဦးတည်ထွက်ပြေးနေတဲ့ ထွက်ပေါက်လမ်းကိုပိတ်လိုက်ပါတယ် ။ပြီး​တော့ ​အော်ဟစ်ဆဲဆိုခြိမ်း​ခြောက် ​သေနတ်နဲ့ချိန်ပြီး ဖမ်းဆီးပါ​တော့တယ်။

စစချင်း ကိုမောင်တစ်​ယောက် စစ်သား​တွေနဲ့မတိုးတာ​ကြောင့် ဖမ်းဆီးတာမခံလိုက်ရပါဘူး။ကိုမောင် အပါအဝင် ​​ဒေသခံ​တွေဟာ ရွာဘုန်းကြီးကျောင်းကို​တော့ စစ်တပ်အကြမ်းမဖက်နိုင်ဘူးလို့​တွေးပြီးဘုန်းကြီး​ကျောင်းဘက်ကိုထွက်​ပြေးခဲ့ကြပါတယ်။ဒါ​ပေမယ့် စစ်သားတွေဟာ ရွာဘုန်းကြီးကျောင်းကို ရောက်လာပြီး ကို​မောင်အပါအဝင် အမျိုးသားတွေကို ထပ်မံဖမ်းဆီးခေါ်ဆောင်သွားပါတယ်။

ရွာသူရွာသား​တွေရဲ့ဖုန်းအားလုံးကို စစ်သား​တွေကသိမ်းယူလိုက်ပါတယ် ။

“တစ်ရွာလုံးဖုန်းအကုန်သိမ်းထားတာကိုယ်တိုဘယ်မှဆက်သွယ်လို့မရဘူး ။မပေးတဲ့ကောင်လည်းသတ်မယ် မပေးလို့ နောက်မိရင် လည်ပင်းလှီးသတ်တာ” လို့ ဖမ်းဆီးခံခဲ့ရတဲ့ ဒေသခံတစ်ဦးကပြောပါတယ်။

စစ်သား​တွေကဘုန်းကြီး​ကျောင်းက အမျိုးသားတွေကိုဖမ်းဆီးသွားတဲ့နောက်ရွာဘုန်းကြီးကျောင်းမှာကိုယ်ဝန်သည်အပါအဝင် အမျိုးသမီးတွေ၊ သက်ကြီးရွယ်အို​တွေ နဲ့ ကလေးငယ်တွေသာကျန်ရစ်ခဲ့ပါတယ်။ဖမ်းထားတဲ့ အမျိုးသား​တွေကို စစ်သားတွေက လက်ပြန်ကြိုးတုပ်ပြီး နှိပ်စက်​မေးမြန်းတာ ၊ ​မြေကြီး​ပေါ် ​မှောက်ခိုင်းထားပါတော့တယ်။

“မှောက်နေရတာ ငါးခြောက်လှန်းထားသလို မျက်နှာလည်းလှန်ကြည့်လို့မရ နားစွန့်ပြီး သူများပြောတာပဲ နားထောင်နေရတယ် ။ PDF ဒီမှာရှိလား လူအင်အား ဘယ်လောက်ရှိလဲ လည်ပင်းဓားနဲ့ထောက်ပြီး မေးတယ် လက်ပြန်ကြိုးတုပ်ထားတော့ ကိုယ့်ဘဝကတော့ သွားပြီပေါ့ “လို့ ကိုမောင်က ဖမ်းဆီးခံရချိန် အ​တွေ့အကြုံကိုပြန်ပြောပြပါတယ်။

တဖြည်းဖြည်းနဲ့ ဖမ်းဆီးခံရတဲ့ရွာသူရွာသားတွေများလာချိန်မှာတော့ စစ်သားတွေကဖမ်းဆီး နှိပ်စက်တာတွေကိုပိုလုပ်လာပါတယ်။ ဒီလိုဖမ်းဆီးနှိပ်စက်ခံနေရပေမယ့် ကိုမောင် တစ်​ယောက်ကတော့ ဘုန်းကြီးကျောင်းမှာကျန်ခဲ့တဲ့ မိသားစုဝင်​တွေကိုပဲ နောက်ဆန်တင်းလို့နေပါတယ်။

အဲ့ဒီချိန်မှာ စစ်တပ်ဟာ ကိုယ်ဝန်ဆောင်မိခင်အပါအဝင် အမျိုးသမီး၊ သက်ကြီးရွယ်အိုနဲ့ ကလေးငယ်တွေခိုလှုံနေတဲ့ ဘုန်းကြီးကျောင်းကို လေကြောင်းကနေဗုံးကြဲလိုက်ပါတယ်။ဒါအပြင် ဒရုန်းနဲ့လည်း ဗုံးကြဲပါတယ်။

စစ်တပ်က​လေယာဥ်​တွေရယ်၊ ဒရုန်း​တွေနဲ့ ဗုံးကြဲမှုကြောင့် ဘုန်းကြီးမှာ ခိုလှုံနေတဲ့ က​လေးငယ်​တွေ၊အမျိုးသမီး​တွေ၊သက်ကြီးရွယ်အို​တွေထဲက ၂၈ ဦးဟာ ပွဲချင်းပြီးသေဆုံးခဲ့ရပါတယ်။ကိုမောင်နဲ့ ရွာသားတွေကို​တော့ စစ်သား​တွေကညှင်းပန်းနှိပ်စက်ပြီးသိချင်တာ​တွေ​မေး​နေတာပါ။

“ဖြည်ပေးပါဦး။ လက်တွေလည်းကပ်နေပြီဆိုတော့ မဖြည်ပေးနိုင်ဘူး သေးပေါက်ချင်ပြီပြောလည်း ပုဆိုးထဲပဲပေါက်ထည့်တဲ့။ ထပ်မှောက်နေဆိုပြီး မှောက်တော့ ခေါင်းထောင်လို့လည်းမရဘူး တနေကုန်ထမင်းအငတ်ထားတာ ပြီးတော့ ဖုန်းမဖွင့်ပေးလို့ ကန်ခံရတယ် သွားတောင်ကျွတ်သွားတယ် “လို့ အဖြစ်ဆိုးကြီးကိုကြုံခဲ့ရတဲ့ အခြားအမျိုးသားတဦးက ဖွင့်ဟပါတယ်။

နောက်မှ ဖမ်းဆီးခံထားရတဲ့ အမျိုးသားတွေဟာ ဘုန်းကြီးကျောင်းကိုစစ်တပ်က ဗုံးကြဲလို့မိသားစုဝင်​တွေ သေဆုံးခဲ့သူတွေရှိတာကိုသိကြရပါတယ်။ အဲဒီလိုသိတာလဲ စစ်သား​တွေရဲ့ အသံဖမ်းစက်တွေကတဆင့်ကြားလို့သိကြတာပါ ။ ကိုယ်တိုင်က​တော့ ​မြေ​ပေါ်မှာ​နေပူကြီးထဲ​ ​ခေါင်းငုံပြီး မှောက်​နေရလို့ ဘာမှမမြင်ရပါဘူး ။

ဘုန်းကြီး​ကျောင်းကမိသားစုဝင်​တွေ ဗုံးကြဲပြီးအစုလိုက်အပြုံလိုက်အသတ်ခံရတာသိရချိန်မှာအမျိုးသား​တွေဟာ ဝမ်းနည်းစိတ်​ကြောင့်ယူကြုံးမရဖြစ်ကြရပါတယ် ။ အဲဒီ​နောက်သေဆုံးခဲ့သူတွေကို သဂြိုလ်ခွင့်ပြုဖို့ စစ်သား​တွေကို တောင်းပန်ပြီး​ပြောပါတယ်။သဂြိုလ်ခွင်ခွင့်ရဖို့ကို​တောင် ဒူးထောက်ပြီးတောင်းပန်ပြီးမှသာ သဂြိုလ်ခွင့်ပြုခဲ့တယ်လို့ ​ဒေသခံ​တွေက​ပြောပါတယ်။

ဘုန်းကြီးကျောင်းမှာပဲ ပွဲချင်းပြီးသေဆုံးခဲ့တဲ့သူ ၂၈ ယောက်ကို ဖမ်းဆီးခံထားရတဲ့ ရွာသား​တွေကိုယ်တိုင်ကကျင်းကြီး ၂ ကျင်းတူးပြီး မြေမြုပ်သဂြိုလ် ပေးခဲ့ကြရတာလည်းဖြစ်ပါတယ်။

“၂၈ ယောက် ကျင်း ၂ ကျင်းတူပြီး မြေမြုပ်ပေးခဲ့ရတယ်။ ဗိုက်ကြီးသည်ဆို ကလေးက ဗိုက်ပေါက်ပြီး လက်တောင်ထွက်နေတာ။ သေတဲ့ထဲမှာ မိန်းမတွေကြည့်ပဲ။ ကလေးတွေ၊ မိန်းမတွေ “လို့ ကိုယ်တိုင် မြေမြုပ်သဂြိုလ်ပေးခဲ့ရသူတဦးက ပြောပါတယ်။သေဆုံးခဲ့ရတဲ့ ၂၈ ယောက်ဟာ ဘုန်း

ကြီးကျောင်းထဲမှာပဲ သေဆုံးခဲ့သူတွေဖြစ်ပါတယ်။ ဒါအပြင် လမ်းမှာ စစ်တပ်က​သေနတ်နဲ့ပစ်သတ်ခံခဲ့ရသူ​တွေလည်းရှိခဲ့ပါတယ်။လမ်းမှာသေဆုံးခဲ့ရသူတွေကိုတော့ စစ်တပ်က သဂြိုလ်ခွင့်မ​ပေးပါဘူး။

ဘုန်းကြီး​ကျောင်းထဲက​သေဆုံးသူ​တွေကိုသဂြိုလ် ခွင့်ရချိန်မှသာကိုမောင်အပါအဝင် ဖမ်းဆီးခံထားရသူတွေဟာ သူတို့မိသားစုဝင်​တွေဘယ်သူသေဆုံးသွားတယ်ဆိုတာကို သိခွင့်ရကြတာလည်းဖြစ်ပါတယ်။စစ်တပ်ကအခုလို ပြည်သူ​တွေကို အစုလိုက်အပြုံလိုက်သတ်ဖြတ်​နေတာဟာ စစ်တပ်အာဏာသိမ်းပြီး​​နောက်ပိုင်းအကြိမ်​ပေါင်းရာ​ချီ​နေပြီဖြစ်ပါတယ် ။

ကံဆိုးချင်​တော့ကိုမောင်ရဲ့အမျိုးသမီးဟာလည်းစစ်တပ်ကဘုန်းကြီးကျောင်းကို ဗုံးကြဲစဥ် သေဆုံးခဲ့ပါတယ် ။သားနဲ့ သမီးတွေကတော့ထိခိုက်ဒဏ်ရာရခဲ့ကြပါတယ်။

နောက်ရက် မတ်လ ၆ ရက်မှာလည်း စစ်တပ်က ဒေသခံတွေကို ဆက်ဖမ်းဆီးထားပြီး ထပ်မံနှိပ်စက်ကြပြန်ပါတယ်။

အဲဒီနောက် ကိုမောင်အပါအဝင် စစ်တပ်က ဓါးစာခံအဖြစ် ဖမ်းခံထားရတဲ့ ပြည်သူ ၃၀၀ ကျော်ကို အမှတ် (၂) စစ်ဆင်ရေးနယ်မြေ၊ ပဲခူးတိုင်းစစ်ဌာန ကွပ်ကဲမှုအောက်က တပ်ရင်းတပ်ဖွဲ့တွေနဲ့ ကရင်အမျိုးသားလွတ်မြောက်ရေးတပ်မတော်၊ တပ်မဟာ (၃) ကွပ်ကဲမှုအောက်က တပ်ရင်းတပ်ဖွဲ့တွေကစစ်တပ်ကိုတိုက်ခိုက်ပူးပေါင်း ကယ်ထုတ်နိုင်ခဲ့ပါတယ်။

ပဲခူးတိုင်းစစ်ဌာန ၊ဗျူဟာ (၂၅) ကွပ်ကဲမှုအောက် ၃၇၀၂ တပ်ရင်း၊ Spring Warriors တပ်ရင်း၊ အထူးကွန်မန်ဒိုတပ်ရင်း၊ ဗျူဟာ (၂၆) ကွပ်ကဲမှုအောက်က တော်ဝင်ဒေါင်းတပ်ရင်း၊တောကျီးကန်းတပ်ရင်း၊ ၃၇၀၃တပ်ရင်း၊ KNLA ကွန်မန်ဒိုတပ်ဖွဲ့တွေ၊ KNLA တပ်ရင်း (၇)၊ တပ်ရင်း (၉) နဲ့ ဒရုန်းတပ်ဖွဲ့တွေပူးပေါင်းပြီး “ပြည်သူကိုကယ်ထုတ်သော စစ်ဆင်ရေး” အဖြစ် ဆောင်ရွက်ခဲ့ကြတာပါ။

စစ်ဆင်ရေးအတွင်းမှာ ပဲခူးတိုင်းစစ်ဌာနက ရဲဘော် ၉ ဦး၊ KNLA တပ်ရင်း (၇) နဲ့ တပ်ရင်း (၉)က ရဲဘော် ၂ ဦး ကျဆုံးခဲ့ပါတယ်။ဒါ့အပြင် (၇) ဦး ပြင်းထန်ဒဏ်ရာရရှိခဲ့ပါတယ်။စစ်တပ်ဘက်က ၁၀ ယောက်ကျော်သေဆုံးပြီး အယောက် ၂၀ထက်မနည်းပြင်းထန်ဒဏ်ရာရရှိခဲ့တယ်လို့

NUG ၊ကာကွယ်​ရေးဝန်ကြီးဌာနကထုတ်ပြန်ပါတယ်။

ပြည်သူ ၃၀၀ ကျော်ကို ထိခိုက်မှုမရှိ ဘေးရန်ကင်းစွာနဲ့ ပူးပေါင်းတပ်တွေက လွတ်မြောက်ရာဒေသတွေကို ကူညီပို့ဆောင်ပေးခဲ့ကြပါတယ်။

“ရွာထဲကနေ ရွာပြင်ရောက်မှပဲ။ အသက်ရှုဝသွားတော့တယ် အတိုင်းမသိ ဝမ်းသာသွားတာ “လို့ကို​​​မောင်ကရင်ဖွင့်ပါတယ် ။

ဒါ​ပေမယ့် ​ဒဏ်ရာရပြီး​ဆေးကုသ​နေတဲ့ ရင်​သွေးငယ်တွေနဲ့ ​သူမတွေ့ရ​သေးပါဘူး ။ဒါ​ကြောင့်ရင်​သွေးငယ်​တွေနဲ့အမြန်​တွေ့ခွင့်ရဖို့ သူစိတ်​စော​နေပါတယ် ။ရင်​သွေးငယ်​တွေအ​ကြောင်း​ပြော​နေချိန်မှာ​တော့ စစ်တပ်လက်ချက်​ကြောင့် ကွယ်လွန်သွားတဲ့ဇနီးသည်အ​ကြောင်း ပြန်​တွေးမိရင်း သူ့အသံ​တွေတိမ်ဝင်သွားပါတယ်။ ။