မကွေးတိုင်း၊ မြိုင်မြို့နယ်ရှိ အိုးဘိုကျေးရွာ စစ်ကောင်စီတပ်၏ သုံးကြိမ်မြောက် မီးရှို့ဖျက်ဆီးခံရပြီး နေအိမ်ပေါင်း ၇၀ခန့် ပျက်စီးဆုံးရှုံးခဲ့ကြောင်း နွေဦးတော်လှန်ရေး – မြိုင်က သတင်းထုတ်ပြန်သည်။
ယနေ့(ဒီဇင်ဘာ ၃၀ ရက်) နံနက် ၄ နာရီ မိနစ် ၂၀ခန့်က ကန်နီကျေးရွာရှိ ပျူစောထီးများနှင့် စစ်ကောင်စီတပ်သားများက မြိုင်မြို့နယ်၊ အိုးဘိုကျေးရွာအား မီးရှို့ဖျက်ဆီးခဲ့ရာ နေအိမ်ပေါင်း ၇၀ခန့် မီးလောင်ကျွမ်းပျက်စီးခဲ့ကြောင်း၊ အိုးဘိုကျေးရွာသည် ယခုအကြိမ်အပါအဝင် သုံးကြိမ်မြောက် မီးရှို့ဖျက်ဆီးခံရခြင်းဖြစ်ကြောင်း နွေဦးတော်လှန်ရေး-မြိုင်က အသိပေးသည်။
ထို့အပြင် စစ်ကောင်စီတပ်သည် ယမန်နေ့နံနက်ပိုင်းက မြိုင်မြို့နယ်မြောက်ပိုင်းရှိ မန်ကျည်းလေးပင်ကျေးရွာအား မီးရှို့ဖျက်ဆီးခဲ့ရာ နေအိမ် ၃၆လုံး မီးလောင်ပျက်စီးခဲ့သည်။
![အိုးဘိုရွာ မီးလောင်ပျက်စီးနေသော နေအိမ်များအား တွေ့ရစဥ်၊ ဓာတ်ပုံ-နွေဦးတော်လှန်ရေး မြိုင်မြို့](https://i0.wp.com/www.ludunwayoo.com/wp-content/uploads/2022/12/323165564_922554255787130_6192519719286572399_n.png?resize=720%2C539&ssl=1)
![အိုးဘိုရွာ မီးလောင်ပျက်စီးနေသော နေအိမ်များအား တွေ့ရစဥ်၊ ဓာတ်ပုံ-နွေဦးတော်လှန်ရေး မြိုင်မြို့](https://i0.wp.com/www.ludunwayoo.com/wp-content/uploads/2022/12/322471637_891016231901644_1067274869289682399_n.png?resize=720%2C542&ssl=1)
![အိုးဘိုရွာ မီးလောင်ပျက်စီးနေသော နေအိမ်များအား တွေ့ရစဥ်၊ ဓာတ်ပုံ-နွေဦးတော်လှန်ရေး မြိုင်မြို့](https://i0.wp.com/www.ludunwayoo.com/wp-content/uploads/2022/12/322162431_1375327633284167_7921066550571310995_n.png?resize=720%2C539&ssl=1)
![အိုးဘိုရွာ မီးလောင်ပျက်စီးနေသော နေအိမ်များအား တွေ့ရစဥ်၊ ဓာတ်ပုံ-နွေဦးတော်လှန်ရေး မြိုင်မြို့](https://i0.wp.com/www.ludunwayoo.com/wp-content/uploads/2022/12/320602404_1219797625561739_1116047590332773932_n.png?resize=720%2C539&ssl=1)
မွန်းလွဲပိုင်းတွင်လည်း ကန်နက်ကျေးရွာအား လေးကြိမ်မြောက် မီးရှို့ခဲ့ပြီး ယခုအကြိမ်တွင် နေအိမ် ၂၈လုံး ဆုံးရှုံးခဲ့ကြောင်း ဒေသခံများက ပြောသည်။
စစ်ကောင်စီတပ်သည် ဒီဇင်ဘာ ၂၃ ရက်က မြိုင်မြို့နယ်၊ ဖောင်းကားကျေးရွာမှ ဒေသခံပြည်သူလေးဦးကိုလည်း သတ်ဖြတ်ခဲ့သည်။ ထို့အပြင် တောင်ရွာကိုလည်း မီးရှို့ဖျက်ဆီးခဲ့ရာ CDM ဆရာမ၏ ဖခင်ဖြစ်သူ အသက်(၈၆)နှစ်အရွယ် အဘိုးအိုတစ်ဦးကိုပါ မီးရှို့သတ်ဖြတ်ခဲ့သည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
ထို့အပြင် တောင်ရွာရှိ နေအိမ် ၄၅ လုံး၊ ကားနှင့်ဆိုင်ကယ်များ၊ မြေပဲတင်း ၃၀၊စပါးတင်း ၅၀၊နှမ်းတင်း ၄၀ လည်းမီးထဲပါသွားကြောင်း ဒေသခံများက ပြောသည်။
စစ်ကောင်စီတပ်သည် ဒီဇင်ဘာ ၂၆ ရက် နံနက်ပိုင်းကလည်း မြိုင်မြို့နယ်အရှေ့တောင်ပိုင်းရှိ ကင်းကျေးရွာမှ အမျိုးသားတစ်ဦးကို ရိုက်နှက်သတ်ဖြတ်ခဲ့ပြီး စစ်ကြောင်းကြောင့် ထွက်ပြေးခဲ့သည့် အသက်(၈၀)ခန့် အဘွားအိုတစ်ဦးလည်း အမောဖောက် သေဆုံးခဲ့သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)