မန္တလေးတိုင်း၊ သပိတ်ကျင်းမြို့နယ်ရှိ ကြာညှပ်ရဲကင်းစခန်းအား ဒရုန်းဖြင့် ဗုံးချတိုက်ခိုက်ခဲ့ကြောင်း TBK တောဆင်ရိုင်းပြောက်ကျားတပ်ဖွဲ့က သတင်းထုတ်ပြန်သည်။
ယမန်နေ့(ဇန်နဝါရီ ၇ ရက်)နံနက် ၁၁နာရီခွဲခန့်က သပိတ်ကျင်းမြို့နယ်၊ ကြာညှပ်ကျေးရွာရဲစခန်းတွင် စစ်ကောင်စီတပ် အင်အား ၁၅ဦးခန့်ရှိနေချိန် ဒရုန်းဖြင့် M9 အမျိုးအစား ဗုံးတစ်လုံးချကာ တိုက်ခိုက်ခဲ့ကြောင်း TBKတောဆင်ရိုင်းပြောက် ကျားတပ်ဖွဲ့၏ ထုတ်ပြန်ချက်တွင် ဖော်ပြသည်။
စစ်ကောင်စီတပ်သားများ အထိအခိုက်မရှိခဲ့သော်လည်း ရဲကင်းစခန်းရှိ လက်နက်တိုက်အနီး ကျရောက် ပေါက်ကွဲခဲ့သဖြင့် အပျက်အစီးရှိဟု ပြောက်ကျားတပ်ဖွဲ့က ဆိုသည်။
![စစ်ဆင်ရေးတွင်တွေ့ရသည့် TBK တောဆင်ရိုင်းပြောက်ကျားတပ်ဖွဲ့ရဲဘော်များ၊ ဓာတ်ပုံ-TBK တောဆင်ရိုင်းပြောက်ကျားတပ်ဖွဲ့](https://i0.wp.com/www.ludunwayoo.com/wp-content/uploads/2023/01/321097884_622434126237180_843833550340247087_n.jpg?resize=720%2C393&ssl=1)
တိုက်ခိုက်မှုအပြီးတွင် စစ်ကောင်စီဘက်က လက်နက်ငယ်ဖြင့် ၁၀ချက်ခန့် ပြန်လည်ပစ်ခတ်ခဲ့သော်လည်း ရဲဘော်များ အထိအခိုက်မရှိ ဆုတ်ခွာနိုင်ခဲ့ကြောင်း TBK တောဆင်ရိုင်းပြောက်ကျားတပ်ဖွဲ့က အသိပေးသည်။
ကြာညှပ်တိုက်နယ်အတွင်းရှိ စစ်ကောင်စီ လက်အောက်ခံ ၊အုပ်ချုပ်ရေးမှူး၊ ရာအိမ်မှုး ၊ဆယ်အိမ်မှူးများ နှုတ်ထွက်ကြရန်နှင့် ပျူစောထီးများလည်း ပြည်သူအပေါ် အနိုင်ကျင့်ဗိုလ်ကျပြီး မတရားနည်းဖြင့် ငွေကြေးကောက်ခံ တောင်းယူမှုများ လုံးဝမလုပ်ကြရန်နှင့် ရပ်တန်းက ရပ်ကြပါရန် အသိပေးကြောင်း၊ လိုက်နာမှုမရှိပါက ပြင်းပြင်းထန်ထန် အရေးယူ တိုက်ခိုက်သွားမည်ဖြစ်ကြောင်း TBK တောဆင်ရိုင်းပြောက်ကျားတပ်ဖွဲ့က သတိပေးသည်။
![စစ်ဆင်ရေးတွင်တွေ့ရသည့် TBK တောဆင်ရိုင်းပြောက်ကျားတပ်ဖွဲ့ရဲဘော်များ၊ ဓာတ်ပုံ-TBK တောဆင်ရိုင်းပြောက်ကျားတပ်ဖွဲ့](https://i0.wp.com/www.ludunwayoo.com/wp-content/uploads/2023/01/324191118_751118183018763_5596040449136205241_n.jpg?resize=720%2C823&ssl=1)
![စစ်ဆင်ရေးတွင်တွေ့ရသည့် TBK တောဆင်ရိုင်းပြောက်ကျားတပ်ဖွဲ့ရဲဘော်များ၊ ဓာတ်ပုံ-TBK တောဆင်ရိုင်းပြောက်ကျားတပ်ဖွဲ့](https://i0.wp.com/www.ludunwayoo.com/wp-content/uploads/2023/01/323626426_623113556284929_8959945027928231042_n.jpg?resize=720%2C706&ssl=1)
ဖြစ်စဥ်နှင့်ပတ်သက်၍ TBK တောဆင်ရိုင်းပြောက်ကျားတပ်ဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
စစ်ကောင်စီအား ဆက်လက်တိုက်ခိုက်ရန် ရန်ပုံငွေလိုအပ်နေ၍ ပါဝင်ကူညီပေးကြရန် TBK တောဆင်ရိုင်းပြောက်ကျားတပ်ဖွဲ့က မေတ္တာရပ်ခံထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)