စစ်အာဏာရှင်ဖြုတ်ချရေး အားသွန်ခွန်စိုက်လုပ်မည်ဟု ဖော်ပြ
ချင်းတော်လှန်ရေးအဖွဲ့အစည်းတစ်ခု ၏ ရုံးစိုက်ရာဌာနချုပ်ကို လေကြောင်းမှ တိုက်ခိုက်ခြင်းမှာ ချင်းပြည်သူတစ်ရပ်လုံးကို မထီမဲ့မြင်ပြုရာရောက်ပြီး ချင်းပြည်သူအားလုံး၏ စစ်ကောင်စီ အပေါ် နာကြည်းမှုများတိုးပွားလာစေကာ ချင်းလူမျိုးများ၏တော်လှန်ရေး စိတ်အားထက်သန်မှုကို ပိုမိုခိုင်မာစေသောလုပ်ရပ်ဖြစ်ကြောင်း မင်းတပ်မြို့နယ် ချင်းကာကွယ်ရေးတပ်(CDF)က ယနေ့ ထုတ်ပြန်သည်။
စစ်ကောင်စီက ယမန်နေ့(ဇန်နဝါရီ ၁၀ရက်) ချင်းအမျိုးသားတပ်ဦး/ချင်းအမျိုးသားတပ်မတော် (CNF/CNA) ဌာနချုပ်တည်ရှိရာ ဝိတိုရိယစခန်းကို လေကြောင်းတိုက်ခိုက်ခဲ့ရာ ရဲဘော် ငါးဦးကျဆုံးပြီး ဒဏ်ရာရသူ ၁၀ခန့်ရှိခဲ့သည်။
စစ်ကောင်စီ လေတပ်မှ CNF/ CNA ဌာနချုပ်တည်ရှိရာ ဝိတိုရိယစခန်းကို လေကြောင်းတိုက်ခိုက်မှုပြုလုပ်ခဲ့ခြင်းအပေါ် ပြင်းထန်စွာ ကန့်ကွက်ရှုတ်ချကြောင်း မင်းတပ် CDFက ထုတ်ပြန်သည်။
စစ်ကောင်စီသည် ချင်းပြည်အနှံ့တွင် ဝေဟင်/မြေပြင် စစ်ကြောင်းများဖြင့် ထိုးစစ်ဆင် တိုက်ခိုက် လျက်ရှိပြီး မင်းတပ် CDF သည် CNF/CNA အပါအဝင် ချင်းတော်လှန်ရေး အင်အားစုများ ၊ နိုင်ငံအနှံ့ရှိ ဘုံရည်မှန်းချက်တူညီသည့် တော်လှန်ရေး အင်အားစုများနှင့် ပိုမို ပူးပေါင်း၍ စစ်အာဏာရှင်ဖြုတ်ချရေး ၊ ဖက်ဒရယ်ဒီမိုကရေစီ ပြည်ထောင်စုတည်ဆောက်ရေး လုပ်ငန်းများတွင် ဆက်လက်ပြီးအားသွန်ခွန်စိုက် ဆောင်ရွက်သွား မည်ဟု ဖော်ပြခဲ့သည်။
လက်ရှိတွင်လည်း မင်းတပ် CDF ရှိရာနယ်မြေသို့ စစ်ကောင်စီတပ်က စစ်ရေးလှုပ်ရှားမှုများပြုလုပ်လာ၍ တိုက်ပွဲဖြစ်ပွားမှုများရှိခဲ့သည်။
