စစ်ကောင်စီ မိုက်ရိုင်းလေလေ စစ်ရေးအရှိန် ပိုမြှင့်လေလေဖြစ်မည်ဟု ချင်းတပ်ဖွဲ့တာဝန်ရှိသူပြော
ချင်းအမျိုးသားတပ်ဦး/ချင်းအမျိုးသားတပ်မတော်(CNF/CNA) ဌာနချုပ်အား စစ်ကောင်စီတပ်က လေကြောင်းမှ ဗုံးကြဲတိုက်ခိုက်ရာ CNA၏ အမျိုးသမီးရဲဘော် နှစ်ဦးအပါအဝင် ရဲဘော် ငါးဦးကျဆုံးခဲ့ကြောင်း ချင်းတပ်ဖွဲ့ တာဝန်ရှိသူတစ်ဦးက ပြောသည်။
CNF ဌာနချုပ်နှင့် ချင်းတပ်ပေါင်းစု ချင်းပြည် ကာကွယ်ရေးပူးပေါင်းကော်မတီ(CJDC)ဌာနချုပ် တည်ရှိရာ ချင်းပြည်နယ် ထန်တလန်မြို့နယ်ကို စစ်ကောင်စီက ဇန်နဝါရီ ၁၀ရက် ညနေပိုင်း၌ လေကြောင်းမှ ဗုံးကြဲတိုက်ခိုက်ခဲ့ခြင်းဖြစ်သည်။
“CNA ရဲဘော် ၅ဦး ကျတယ်။ ရဲမေ ၂ဦး ပါတာပေါ့။ ထိခိုက်ဒဏ်ရာကတော့ ဆယ်ဂဏန်းရှိတယ် ပြောတယ်။ နေအိမ်တွေပျက်စီးကုန်တယ်”ဟု ချင်းတပ်ဖွဲ့ သတင်းရင်းမြစ်တစ်ဦးက ပြောသည်။
စစ်ကောင်စီတပ်အနေဖြင့် မြေပြင်တိုက်ပွဲများ၌ အထိနာ၍ လေကြောင်းမှ တိုက်ခိုက်လာခြင်းဖြစ်သည်ဟု ၎င်းက ဆိုသည်။
“စစ်ကောင်စီက မြေပြင်မှာ အင်အားချင်းမယှဉ်နိုင်လို့ လေကြောင်းကို အားကိုးနေတာလို့ပဲ ပြောချင်တယ်။ ကျနော်တို့ ချင်းလူမျိုးတွေ အတွက် ဘယ်တော့မှ မေ့ပစ်မသွားမယ့် ဖြစ်ရပ်။ ဒါကြောင့် သူက မိုက်ရိုင်းလေလေ ကျနော်တို့ကတော့ စစ်ရေး အရှိန်ပိုမြှင့်လေလေပဲဖြစ်မှာပါ”ဟု ချင်းတပ်ဖွဲ့တာဝန်ရှိသူ တစ်ဦးက ပြောသည်။
ယခုလေကြောင်း တိုက်ခိုက်ခံရမှု ဖြစ်စဉ်နှင့်ပတ် သက်ပြီး CNF/CNA ပြောရေးဆိုခွင့်ရှိသူ ဆလိုင်းထက်နီထံသို့ ဆက်သွယ်မေးမြန်းထားဆဲဖြစ်သည်။
