မကွေးတိုင်း၊ ပခုက္ကူမြို့နယ်၊ ပခုက္ကူ-မြိုင် ကားလမ်းမကြီးအနီးတွင် စစ်အုပ်စု၏ မော်တော်ယာဥ်တန်းအား မျှားခေါ်ပြီး မိုင်းဆွဲတိုက်ခိုက်ခဲ့ရာ နှစ်ဦးသေဆုံးကြောင်း YoungForce (UG)အဖွဲ့က သတင်းထုတ်ပြန်သည်။
ဇန်နဝါရီ ၁၃ ရက် မွန်းလွဲ ၁နာရီဝန်းကျင်က ပခုက္ကူ-မြိုင် ကားလမ်းမကြီးအနီးတွင် စစ်ကောင်စီတပ်သား၊ ရဲနှင့် ပျူစောထီးများအား ကာကွယ် ရေးတပ်ဖွဲ့ရဲဘော်များက အယောင်ပြမျှားခေါ်ပြီးနောက် မိုင်းဆွဲတိုက်ခိုက်ခဲ့ခြင်းဖြစ်ကြောင်း YoungForce (UG)အဖွဲ့က အသိပေးသည်။
ကား သုံးစီးအနက် တစ်စီးမှာမြောက်တက်သည်အထိ ဖြစ်ခဲ့ပြီး မတ်တူးကားပေါ်ပါလာသော စစ်ကောင်စီတပ် သားများ အပြင်းအထန်ဒဏ်ရာရပြီး နှစ်ဦးသေဆုံးသည်ဟု YoungForce (UG)အဖွဲ့က ဆိုသည်။
ပစ်ခတ်တိုက်ခိုက်ရန် အစီအစဥ်ဆွဲထားသော်လည်း လက်နက်နှင့် လူအင်အား မမျှခြင်း၊ စစ်ကူများ အလျင်မြန် ရောက်လာခြင်းများကြောင့် ရဲဘော်များ ဆုတ်ခွာခဲ့သည်ဟု ၎င်းအဖွဲ့က အသိပေးသည်။
ကျန်ကားတစ်စီးမှာ လုံးဝပျက်စီးသွားပြီး ကားနှင့်ပြန်ဆွဲကာ ဒဏ်ရာရစစ်သားများအား လာရောက် သယ်သွားပြီး အနီးဝန်းကျင်ကို လက်နက်ကြီး ငါးချက်ထက်မနည်း ပစ်ခတ်သွားကြောင်း YoungForce (UG)အဖွဲ့၏ ထုတ်ပြန်ချက်တွင် ဖော်ပြသည်။
အဆိုပါ စစ်ဆင်ရေးကို BraveEaglesYGN(UG)၊သံမဏိသိန်းငှက် (မြိုင်) ၊ PeopleSafeArmy၊
ThuRain(TR)တပ်ခွဲ၊ ပခုက္ကူမြို့ပြည်သူ့ကာကွယ်ရေးတပ်ဖွဲ့၊ YoungForce(UG) တို့က တိုက်ခိုက်ခဲ့ခြင်းဖြစ်ကြောင်း ထုတ်ပြန်ထားသည်။
ဖြစ်စဥ်နှင့်ပတ်သက်၍ YoungForce (UG)အဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။ စစ်အုပ်စု၏ ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
