စစ်ကောင်စီတပ် ၁၅ဦးသေ၊ လက်နက်များရဟုTNLAထုတ်ပြန်
ရှမ်းပြည်နယ်မြောက်ပိုင်း ကျောက်မဲမြို့နယ်တွင် တအာင်းတပ်မတော် (TNLA)နှင့် စစ်ကောင်စီတပ်တို့ ယနေ့ တိုက်ပွဲဖြစ်ပွားခဲ့ပြီး စစ်ကောင်စီတပ် ၁၅ဦးသေဆုံးကာ ငါးဦး ဒဏ်ရာရရှိခဲ့သည်ဟု TNLA က ထုတ်ပြန်သည်။
ယနေ့ (ဖေဖော်ဝါရီ ၂၀ ရက်)နံနက်တွင် စစ်ကောင်စီတပ်က အင်အား ၆၀ဖြင့် TNLA စခန်းရှိရာ တပ်ကုန်းသို့ ထိုးစစ်ဆင်လာ၍ တိုက်ပွဲဖြစ်ပွားခဲ့သည်ဟု ဖော်ပြထားသည်။
တိုက်ပွဲပြင်းထန်ခဲ့ပြီး စစ်ကောင်စီတပ်က တိုက်လေယာဉ်၊ ရဟတ်ယာဉ်၊ လက်နက်ကြီးတို့ ပစ်ကူပေးတိုက်ခိုက်ခဲ့သည်ဟု ဆိုသည်။
တိုက်ပွဲမှာ ၂နာရီကျော်ကြာမြင့်ခဲ့ပြီး စစ်ကောင်စီတပ်ထံမှ စက်သေနတ်တစ်လက်၊ RPG တစ် လက်၊ သေနတ်နှစ်လက်နှင့် စစ်အသုံးအဆောင်ပစ္စည်းများရရှိခဲ့ကြောင်း အသိပေးထားသည်။
စစ်ကောင်စီတပ်က ၁၅ဦးသေ၊ ၅ဦးဒဏ်ရာရခဲ့ကြောင်း ထုတ်ပြန်ထားပြီး TNLA ဘက်မှ ထိခိုက်မှုရှိမရှိ အခြေအနေကို ဖော်ပြမထားပေ။ တိုက်ပွဲအခြေအနေနှင့်ပတ်သက်ပြီး မေးမြန်းရန် TNLA သတင်းနှင့် ပြန်ကြားရေးဌာနသို့ ဆက်သွယ်နေဆဲဖြစ်ပြီး အဆက်အသွယ်မရသေးပေ။
တိုက်ပွဲဖြစ်ပွားမှုကြောင့် ပန်ဝိုးကြီးရွာမှ နေအိမ် နှစ်လုံး ထိမှန်ပျက်စီးခဲ့ကြောင်း၊ စစ်ကောင်စီတပ်က လက်ရှိတွင် နန်ခုံရွာ၌ ဆက်လက်တပ်စွဲထားကြောင်း ဖော်ပြသည်။
