ကရင်နီ(ကယား)ပြည်နယ်၊ လွိုင်ကော်မြို့ လင်ဖုံလေးလမ်းခွဲရှိ စစ်ကောင်စီတပ် ကင်းပုန်းအားတိုက်ခိုက်ရာ တစ်ဦးသေဆုံးကြောင်း ကရင်နီအမျိုးသားများကာကွယ်ရေးတပ်(KNDF)တပ်ရင်း – ၁၄ က ယနေ့ ထုတ်ပြန်သည်။
ယမန်နေ့(မတ်လ ၁၇ ရက်)၊နံနက် ၆ နာရီခွဲခန့်တွင် KNDFတပ်ပေါင်းစုမှ လွိုင်ကော်မြို့၊ လင်ဖုံလေးလမ်းခွဲရှိ စစ်ကောင်စီတပ် ကင်းပုန်းတစ်ခုမှ စစ်ကောင်စီတပ်သားများအား စနိုက်ပါဖြင့် ပစ်ခတ်ခဲ့ခြင်းဟု ဆိုသည်။
ထိုသို့တိုက်ခိုက်မှုတွင် စစ်ကောင်စီတပ်သားတစ်ဦးအားပစ်ခတ်သုတ်သင်နိုင်ခဲ့ပြီး ကျန်ထိခိုက်မှုများလည်းရှိနိုင်ကြောင်း အသိပေးသည်။
ထို့အပြင် KNDFတပ်ပေါင်းစုမှ ထိခိုက်မှုတစ်စုံတစ်ရာမရှိဘဲ ပြန်လည်ဆုတ်ခွာလာနိုင်ခဲ့ကြောင်းလည်း ဖော်ပြထားသည်။
“ မြေပြင် အသေးစိတ်တွေတော့ ပြောလို့မရသေးပေမယ့် ကရင်နီဒေသမှာတိုက်ပွဲတွေ နေ့စဥ် ပြင်းထန်နေတယ်။ဒီးမော့ဆိုမှာဆိုရင် မနေ့ကတည်းက အခုဒီနေ့အထိ မနားသေးဘူး” ဟု KNDF တာဝန်ရှိသူက လူထုနွေဦးသို့ ပြောသည်။
ယခုလ ဆန်းပိုင်းကစ၍ ကရင်နီဒေသအနှံ့ ထိုးစစ်ဆင်နေသော စစ်ကောင်စီတပ်မှာ အထိနာ နေပြီး ဒီးမော့ဆို ၊ ဖယ်ခုံ ၊မိုးဗြဲနှင့် ပင်လောင်း တိုက်ပွဲများ၌ သေဆုံးသူ ၄၀ထက်မနည်းရှိပြီး စစ်ကောင်စီတပ်သားခြောက်ဦး အရှင်ဖမ်းမိကာ လက်နက်ခဲယမ်းများကို ကရင်နီတပ်ပေါင်းစုက သိမ်းဆည်းရရှိထားသည်။
