အာဏာသိမ်း စစ်ကောင်စီ၏ ခုံရုံးမှ မြောက်ဥက္ကလာပမြို့နယ် ကျောင်းသားများသမဂ္ဂ (ဗကသများအဖွဲ့ချုပ်)၏ မြေပြင်လှုပ်ရှားမှုရေးရာတာဝန်ခံ ကိုကောင်းဆက်ပိုင်အား ယမန်နေ့တွင် ထောင်ဒဏ် တသက်တကျွန်း မတရားအမိန့်ချလိုက်ကြောင်း ဗကသများအဖွဲ့ချုပ်က ထုတ်ပြန်သည်။
ကိုကောင်းဆက်ပိုင်အား စစ်ကောင်စီ ဖက်ဆစ်ခုံရုံးက မတရားစွဲဆိုထားသော ၅၀၅(က)၊ ၅၀(ည) ပုဒ်မတို့ဖြင့် ထောင်ဒဏ် တသက်တကျွန်းအမိန့်ချလိုက်ခြင်း ဖြစ်ကြောင်း ဗကသများအဖွဲ့ချုပ်က ဆိုသည်။
“ ကိုကောင်းဆက်ပိုင်ကို မနေ့က ထောင်ဒဏ် တသက်တကျွန်း မတရား အမိန့်ချလိုက်တယ်လို့ သိရပါတယ်။ ဒီတော်လှန်ရေးမှာ ကျွန်တော်တို့ နိုင်မှလွတ်မယ့်သူ၊ ကျွန်တော်တို့ နိုင်မှကျွတ်မယ့်သူတွေ ရှိတဲ့အတွက် တော်လှန်ရေးအောင်မြင်ဖို့ ပိုကြိုးစားကြဖို့ လိုပါတယ်။ ပြည်သူတွေကိုလည်း သွေးအေးမသွားဘဲ တော်လှန်ရေးကို တတ်နိုင်တဲ့ဘက်က ကူပေးကြပါလို့ တိုက်တွန်းလိုပါတယ် “ ဟု တော်လှန်ရေးအင်အားစုမှ ကျောင်းသားလူငယ်တစ်ဦးက ဆိုသည်။
အသက် (၂၀)နှစ်အရွယ်ရှိ ဗကသရဲဘော် ကိုကောင်းဆက်ပိုင်သည် ပြီးခဲ့သည့် ၂၀၂၂ ဒီဇင်ဘာ ၁ ရက်တွင် စစ်ကောင်စီတပ်၏ အကြမ်းဖက် ဖမ်းဆီးခြင်းခံခဲ့ရပြီးနောက် ယခုကဲ့သို့ မတရားအမိန့် ချမှတ်ခံရခြင်း ဖြစ်ကြောင်း ဗကသများအဖွဲ့ချုပ်က ဆိုသည်။
ပြီးခဲ့သည့် ဖေဖော်ဝါရီ ၉ ရက်တွင်လည်း အထက (၁) မြောက်ဥက္ကလာပ ကျောင်းသားများသမဂ္ဂ (ဗကသများအဖွဲ့ချုပ်)၏ ဒုဥက္ကဌဖြစ်သူ ကိုဟိန်းထက် (ခ) ကိုပိုပိုအား စစ်ကောင်စီ၏ ဖက်ဆစ်ခုံရုံးက ထောင်ဒဏ် တသက်တကျွန်း ချမှတ်ခဲ့သေးသည်။
