ဒေါ်အောင်ဆန်းစုကြည်၏ NLD အပါအဝင် နိုင်ငံရေးပါတီ ၄၀ကို ဖျက်သိမ်းရန် စစ်အာဏာရှင် ၏ ဆုံးဖြတ်ချက်သည် မြန်မာပြည်သူလူထု၏ အခွင့်အရေးနှင့် လွတ်လပ်ခွင့်များကို ထပ်မံခြိမ်းခြောက်ခြင်းဖြစ်ကြောင်း ဗြိတိန်နိုင်ငံခြားရေးရုံးက ပြောရေးဆိုခွင့်ရှိသူက ထုတ်ပြန်သည်။
စစ်အာဏာရှင်၏ နိုင်ငံရေးအရ လှုံ့ဆော်သည့် လုပ်ဆောင်ချက်များနှင့် အကြောက်တရားသွင်း၍ ဆန့်ကျင်မှုများအား ဖိနှိပ်ရန်အတွက် ပိုမိုရက်စက်သော နည်းဗျူဟာများအသုံးပြုခြင်းကို ဗြိတိန်က ပြစ်တင်ရှုတ်ချကြောင်း ဖော်ပြသည်။
“ပြည်သူလူထုရဲ့ ဒီမိုကရေစီဝါဒအခြေခံတဲ့ ဆန္ဒများကို လေးစားသော၊ လေးနက်ပြီး အားလုံးပါဝင်နိုင်သော တွေ့ဆုံဆွေးနွေးမှုများ မလုပ်ဆောင်ဘဲ စစ်အာဏာရှင်ဟာ ၎င်းတို့ဖန်တီးထားတဲဲ့ ကျပ်တည်းတဲ့ အခြေအနေကို ဖြေရှင်းလို့ မရနိုင်ပါဘူး” ဟု ဗြိတိန်နိုင်ငံခြားရေးရုံးပြောခွင့်ရပုဂ္ဂိုလ်က ဆိုသည်။
ဗြိတိန်သည် လုပ်ဖော်ကိုင်ဖက်များနှင့်အတူ အကြမ်းဖက်မှုအားလုံးကို အဆုံးသတ်ပြီး လေးနက်၍ အားလုံးပါဝင်နိုင်သော အပြန်အလှန်ဆွေးနွေးမှုမျိုးဖန်တီးပေးရန် စစ်အာဏာရှင်ကို ဆက်လက်ဖိအားပေးလုပ်ဆောင်သွားမည်ဟု ထုတ်ပြန်သည်။
ထို့အပြင် ငြိမ်းချမ်း၍အားလုံးပါဝင်နိုင်သည့် အနာဂတ်ဒီမိုကရေစီရရှိရေးအတွက် ကြိုးပမ်းနေသည့် မြန်မာပြည်သူလူထုနှင့် ၎င်းတို့၏ ရည်မှန်းချက်များနှင့်အတူ ဗြိတိန်က ရပ်တည်ကြောင်းထပ်လောင်း ကတိပြုသည်။
