စစ်ကိုင်းတိုင်း ထီးချိုင့်မြို့နယ်မှ အိမ်ခြေနှစ်ထောင်ခန့်ရှိသော ညောင်ပင်သာကျေးရွာကို စစ်ကောင်စီတပ်က ယနေ့နံနက်ပိုင်းတွင် မီးရှို့ဖျက်ဆီးနေကြောင်း မြို့ခံများက ပြောသည်။
“ မနက် ၉ နာရီလောက်မှာ ဝင်ရှို့တာ။ ရွာကလူတွေက မနေ့ကထဲက ထွက်ပြေးခဲ့ကြရတာ။ တိုက်ပွဲမဖြစ်ဘဲနဲ့ဝင်ရှို့တာ” ဟု ထီးချိုင့်မြို့ခံတစ်ဦးက ပြောသည်။
ညောင်ပင်သာရွာသည် ထီးချိုင့်နှင့် တကောင်းမြို့ကြားတွင်တည်ရှိသည့် ကျေးရွာကြီးတစ်ရွာဖြစ်သည်။
“ ရွာအနောက်နဲ့ အရှေ့ဘက်ကနေပတ်ရှို့နေတာ။ ရွာထဲကို ဝင်မရတော့ အခုဘယ်လောက်တောင်လောင်နေလဲဆိုတာ မသိရဘူး” ဟု ဒေသခံတစ်ဦးက ပြောသည်။
ညောင်ပင်သာသာရွာ မီးရှို့ဖျက်ဆီးနေသည့်စစ်ကောင်စီစစ်ကြောင်းတွင် အင်အား ၁၀၀ခန့်ရှိသည်ဟု သတင်းရရှိသည်။
ထီးချိုင့်မြို့မှထွက်လာသော ကျောက်စိမ်းများတင်ဆောင်လာသည့် (၄၃)စီးပါ စစ်ကောင်စီ ယာဉ်တန်းကို တကောင်းတိုက်နယ် ရွာလယ်ချောင်းတံတားအနီးနှင့်မိုးကောင်းဦးဝင်ပေါက်အနီးတွင် မတ်လ ၂၉ရက်နံနက်ပိုင်းက မိုင်းဆွဲတိုက်ခိုက်ခံရသောကြောင့် အရပ်သားနေအိမ်များကို အညိုးတကြီးဖျက်ဆီးနေခြင်းဟု ဒေသခံများက ပြောသည်။
