ထိုင်း − မြန်မာ နယ်စပ် သံလွင်မြစ်ကမ်းဘေးက စစ်ကောင်စီရဲ့ မယ်ခါးထာ အခြေစိုက်စခန်းကို တိုက်ခိုက်တဲ့ စခန်းသိမ်းတိုက်ပွဲမှာ စစ်ကောင်စီဘက်က ၁၆ ဦး သေဆုံးသွားတယ်လို့ KNU ဘက်က ဒီနေ့မှာအတည်ပြု လိုက်ပါတယ်။
ဒါအပြင် စစ်ကောင်စီတပ်ဖွဲ့ဝင် ၇ ဦးဒဏ်ရာရပြီး အဲဒီအထဲက ၅ ဦးဟာ သံလွင်မြစ်ကိုဖြတ်ကူးကာ ထိုင်းနိုင်ငံထဲ ဝင်ရောက်ထွက်ပြေးသွားတယ်လို့ KNU မူတြော်ခရိုင်သတင်းစဉ် ကဆိုပါတယ်။
သံလွင်မြစ် ဘေး မှာ တည်ရှိပြီး စစ်ရေးအရအရေးပါတဲ့ စစ်ကောင်စီ စခန်းကို မတ်လ ၂၈ ရက် မနက်ပိုင်း ၅ နာရီဝန်းကျင် ကစတင်ပြီးတိုက်ခိုက်ရာ ၄၅ မိနစ်ကြာပြီးနောက် စခန်းသိမ်းနိုင်ခဲ့တယ်လို့သိရပါတယ်။
တိုက်ပွဲအတွင်း စစ်ကောင်စီတပ်ဆီက စိန်ပြောင်း၊ စက်သေနတ်၊ ပခုံးထမ်း အာပီဂျီအပါအဝင် ဆက်သွယ်ရေးစက်တွေ ၊ စကားပြောစက်တွေ သိမ်းဆည်းရမိတယ်လို့ KNU က ပြောပါတယ်။
မယ်ခါးထာစခန်းဟာ ၁၉၉၅ ခုနှစ်က စစ်တပ်က သိမ်းယူထားပြီး ထိန်းချုပ်ထားတာဖြစ်ကာ နှစ်ပေါင်း ၂၈ နှစ်အကြာမှာ KNU ဘက်က ပြန်လည်သိမ်းယူနိုင်ခဲ့တာလည်းဖြစ်ပါတယ်။
