နိုင်ငံတကာမှ ဝိုင်းဝန်းအရေးယူ အပြစ်ပေးမှု ပြုလုပ်ရန် တောင်းဆို
အကြမ်းဖက် စစ်ကောင်စီတပ်က ချင်းပြည်နယ် ထန်တလန်မြို့နယ် ခွာဖိုရွာ ပြည်သူများအား လေကြောင်းမှ ဗုံးကြဲတိုက်ခိုက်ခဲ့ရာ ယင်းလုပ်ရပ်သည် စစ်ရာဇဝတ်မှု ကျူးလွန်ခြင်းဖြစ်ကြောင်း ချင်းအမျိုးသားတပ်ဦး(CNF)က ထုတ်ပြန်ကြေညာခဲ့ပြီး နိုင်ငံတကာ မိသားစုမှ ဝိုင်းဝန်းအရေးယူ အပြစ်ပေးမှုများ ပြုလုပ်ရန် တောင်းဆိုခဲ့သည်။
စစ်ကောင်စီတပ်သည် ခွာဖိုရွာကို မတ်လ ၃၀ရက် က လေကြောင်းမှ လေးကြိမ် ဗုံးကြဲတိုက်ခိုက်ခဲ့ရာ အမျိုးသမီး ငါးဦး အပါအဝင် အရပ်သား ရှစ်ဦး သေဆုံးခဲ့ပြီး ၁၁ဦးဒဏ်ရာရရှိခဲ့သည်ဟု ဖော်ပြသည်။ သေဆုံးထိခိုက်ခဲ့သူများအနက် ကလေးငယ်များလည်း ပါဝင်သည်။
ထို့ပြင် လူနေအိမ်ခြေ ၁၃လုံး မီးလောင် ပျက်စီးခဲ့ကြောင်း ဖော်ပြထားသည်။
ခွာဖိုရွာ အကြမ်းဖက်မှုအတွင်း အသက်ဆုံးရှုံးခဲ့ရသည့် အပြစ်မဲ့ပြည်သူများ၏ မိသားစုများ ရပ်ဆွေရပ်မျိုးများနှင့်အတူ ဝမ်းနည်းကြောင်း CNF က ဖော်ပြခဲ့ပြီး ဘုရားရှင်ထံ စိတ်နှလုံး ငြိမ်သက်ခြင်း သက်ရောက်စေကြောင်း ဆုတောင်းမေတ္တာပို့ခဲ့သည်။
အကြမ်းဖက် စစ်ကောင်စီ၏ အပြစ်မဲ့ပြည်သူများအပေါ် လူမဆန်စွာ အကြမ်းဖက် ဗုံးကြဲ သတ်ဖြတ်သည့် စက်ဆုပ်ဖွယ် လုပ်ရပ်သည် စစ်ရာဇဝတ်မှုကို ပြောင်ပြောင်တင်းတင်း ကျူးလွန်ချိုးဖောက်ခြင်း ဖြစ်ပြီး ရည်ရွယ်ချက်ရှိရှိဖြင့် လူမျိုးသုဉ်း သတ်ဖြတ်ခြင်းဖြစ်၍ ပြင်းပြင်းထန်ထန် ကန့်ကွက် ရှုတ်ချကြောင်း CNFက ထုတ်ပြန်သည်။
CNF/CNA(ချင်းအမျိုးသားတပ်မတော်) အနေဖြင့် စစ်ကောင်စီအား နည်းပေါင်းစုံဖြင့် တိုက်ခိုက်ချေမှုန်းသွားမည် ဖြစ်ကြောင်း အသိပေးခဲ့ပြီး နိုင်ငံရေး ခံယူချက်၊ ဦးတည်ချက် တူသည့် တိုင်းရင်းသားညီနောင် မဟာမိတ်များ၊ NUG အစိုးရ၊ နွေဦးတော်လှန်ရေး လက်နက်ကိုင်အင်အားစုများနှင့်အတူ စစ်အာဏာရှင် စနစ် ကျဆုံးသည်အထိ အဆုံးတိုင် တိုက်ပွဲဝင်သွားမည်ဖြစ်ကြောင်းလည်း ထုတ်ပြန်ခဲ့သည်။
