မန္တလေးတိုင်း၊ မတ္တရာမြို့နယ်တွင်း မတ်လအတွင်း စစ်ကောင်စီတပ်နှင့်ပျူစောထီးများအား လေးကြိမ် တိုက်ခိုက်ရာ စစ်အုပ်စုထိခိုက်သေဆုံးမှုများရှိပြီး သေနတ် လေးလက်နှင့် ကျည်များ သိမ်းဆည်းရမိကြောင်း မတ္တရာ(ပကဖ) တာဝန်ခံက ပြောသည်။
မတ်လ ၇ ရက်က ကျွဲကျကျေးရွာတွင် တိုက်ပွဲဖြစ်ပွားနေစဥ် စစ်ကူလာရန်ပြင်ဆင်နေသော ဆည်တော်ဘက်မှ ပျူများအား တိုက်ခိုက်ရာ ဦးဆောင်သူ စကားပင်အုပ်ချုပ်ရေးမှူး ဦးထွန်းထွန်းလင်းနှင့် ပျူတစ်ဦးအားရှင်းလင်းနိုင်ခဲ့ကြောင်း မတ္တရာ(ပကဖ)အဖွဲ့က ပြောသည်။
အဆိုပါစစ်ဆင်ရေးမှ ကာဘိုင် တစ်လက်၊ ပွိုင့်တူးတူး သုံးလက်၊ ကာဘိုင်ကျည် အတောင့် ၆၀၊ ပွိုင့်တူးတူး သုံးတောင့်ကို မတ္တရာ(ပကဖ)က သိမ်းဆည်းနိုင်ခဲ့သည်။
မတ်လ ၁၆ ရက် နံနက် ၉ နာရီခန့်ကလည်း မတ္တရာမြို့နယ်၊ ကြားရွာနေ စစ်ကောင်စီခန့်အုပ်ချုပ်ရေးမှူး ဦးရဲသန်းနှင့်ပျူများအား ဝင်ရောက်ရှင်းလင်းရာ အုပ်ကြီးနှင့်ပျူတစ်ဦးသေဆုံးခဲ့ကြောင်း၊ ထို့အပြင် ၎င်းတို့ထံမှ ကာဘိုင် နှစ်လက်၊ ကာဘိုင်ကျည် အတောင့် ၂၀၊ ကျည်ဘောက် နှစ်ခုသိမ်းဆည်းနိုင်ခဲ့ကြောင်း ပကဖအဖွဲ့က ပြောသည်။
“ပထမလက်နက်ရရှိတဲ့ဖြစ်စဥ်က ကျွဲကျမှာ တိုက်ပွဲဖြစ်နေတဲ့အပေါ်မှာ ပျူတွေကလူစုပြီး တပ်ကူလာမယ့်သဘောကြားတဲ့အတွက် ဖြတ်တောက်တိုက်ခိုက်ခဲ့တာပါ။ ဒုတိယဖြစ်စဥ်က ပျူတွေတော်တော်သောင်းကျန်းနေတယ်လို့သတင်းရလို့ ရုတ်တရက်စီးနင်းတိုက်ခိုက်ခဲ့တာပါ။ ပျူခေါင်းဆောင်အိမ်ပတ်ပတ်လည်မှာ ပျူတွေဖြစ်နေတယ်။ ရှိမှန်းတော့သိတယ်။ အဲလောက်များမှန်းမသိဘူး။၇အိမ်လောက်ကပျူတွေထွက်ပစ်တယ်။”ဟု မတ္တရာ(ပကဖ)၏ တာဝန်ခံက ပြောသည်။
မတ်လ ၁၈ ရက် နံနက် ၆ နာရီခွဲခန့်က မတ္တရာနယ်အရှေ့ပိုင်း လက်ဝဲကြီးရွာနှင့် ကျောက်တံတားရွာကြား၌ မိုင်းရှာနေသော စစ်ကောင်စီတပ်ကိုမိုင်းဆွဲတိုက်ခိုက်ရာ အရာရှိတစ်ဦးအပါအဝင် သုံးဦး ဒဏ်ရာအပြင်းအထန်ရရှိကြောင်း မတ္တရာ(ပကဖ)အဖွဲ့က ဆက်ပြောသည်။
မတ်လ ၃ဝ ရက် နံနက် ၈ နာရီဝန်းကျင်ကလည်း မတ္တရာ(ပကဖ)နှင့် နဂါးညီနောင် ပြည်သူ့ကာကွယ်ရေးတပ်ဖွဲ့ တို့ပူးပေါင်းပြီး ကင်းရွာတောင်ပိုင်း၌ တပ်စွဲထားသော စစ်ကောင်စီတပ်ကို ဒရုန်းနှစ်စီးဖြင့် ဗုံးသီးနှစ်လုံးချတိုက်ခိုက်ခဲ့ကြောင်း ပကဖက ထုတ်ပြန်ထားသည်။
