ရွှေကုက္ကိုလ်မြို့ထဲဝင်ထွက်ခွင့် ပိတ်ထား
ကရင်ပြည်နယ် ရွှေကုက္ကိုလ်မြို့သစ်အနီး ထိကော်ထောကျေးရွာရှိ စစ်ကောင်စီနှင့် နယ်ခြားစောင့်တပ်(BGF) ပူးပေါင်းတပ်ဖွဲ့တို့ နေထိုင်ရာစခန်းကို ယနေ့ နံနက်က တော်လှန်ရေးပူးပေါင်းအဖွဲ့များ ဝင်ရောက်တိုက်ခိုက်ခဲ့ပြီး နှစ်ဖက်တိုက်ပွဲပြင်းထန်ခဲ့ကြောင်း ဒေသခံများက ပြောသည်။
ဧပြီလ(၅)ရက် နံနက်(၅)နာရီအချိန်ခန့်တွင် ရွှေကုက္ကိုလ်မြို့သစ်အနီးပတ်ဝန်းရှိ ထိကော်ထော၊ ထီးချားရားနှင့် ထီးဝါးပလော ကျေးရွာများဘက်တွင်ရှိသည့် နယ်ခြားစောင့်တပ်(BGF)စခန်းများကို တော်လှန်ရေးတပ်ပေါင်းစုအဖွဲ့များက ဝင်ရောက်တိုက်ခိုက်ခဲ့ခြင်းဖြစ်ပြီး လက်နက်ငယ်ပစ်ခတ်သံများ ကြားနေရကြောင်း ဒေသခံတစ်ဦးက ပြောသည်။
” အခုထက်ထိ အသံတွေကြားနေရတုန်း။ တိုက်ပွဲဖြစ်တဲ့နေရာက ရွှေကုက္ကိုလ်နဲ့ သိပ်မဝေးဘူး နီးနီးလေးပါပဲ။ ရွှေကုက္ကိုလ်-ထိကော်ထော-မော်ဖားသူးသွားတဲ့လမ်းမှာ” ဟု ဒေသခံတစ်ဦးက ပြောသည်။
တိုက်ပွဲများကြောင့် ရွှေကုက္ကိုလ်မြို့အဝင်အထွက်နေရာများအားလုံးကို နယ်ခြားစောင့်တပ်(BGF)က ပိတ်ပစ်လိုက်ပြီး လုံခြုံရေးတိုးမြှင့်ထားကာ မြို့တွင်းရှိနေထိုင်သူများကိုလည်း အပြင်သို့ထွက်ခွါခွင့်မပြုကြောင်း BGF နှင့်နီးစပ်သူများက ပြောကြားသည်။
“ဒီမနက်က ထိကော်ထောမှာ တိုက်ပွဲဖြစ်တယ်။ ထိကော်ထောက ရွှေကုက္ကိုလ်နဲ့ သိပ်မဝေးဘူး။ ထီးချားရားနဲ့ ထီးဝါးပလောဘက်မှာလည်း ဖြစ်တယ်။ အခု ရွှေကုက္ကိုလ်မြို့ထဲမှာ ဘယ်သူ့ကိုမှ အပြင်ထွက်ခွင့် မပေးတော့ဘူး။ အဝင်အထွက်နေရာအားလုံးလည်း ပိတ်ထားလိုက်ပြီ” ဟု ဒေသခံတစ်ဦးက ပြောသည်။
တိုက်ပွဲကြောင့် နှစ်ဖက်ထိခိုက်မှုကို လတ်တလောတွင် မသိရှိရသေးပဲ စစ်ရေးအခြေအနေများ ပိုမိုတင်းမာလာနိုင်ကြောင်း ဒေသခံများက ဆိုသည်။
