ဖက်ဒရယ်ဒီမိုကရေစီပြည်ထောင်စုကိုလက်တွဲပုံဖော် တည်ထောင်ရန် တိုက်တွန်း
အနာဂတ် ဖက်ဒရယ်ဒီမိုကရေစီ ပြည်ထောင်စုကို အတူလက်တွဲပုံဖော်ရန် အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက ၀လက်နက်ကိုင်အဖွဲ့ ၀ပြည်သွေးစည်းညီညွတ်ရေးပါတီ(UWSP/UWSA)ထံ ဖိတ်ခေါ်လိုက်သည်။
ယမန်နေ့ ဧပြီ ၁၇ရက်က ကျရောက်သည် ၀ဒေသ ငြိမ်းချမ်းရေးတည်ဆောက်မှု (၃၄)နှစ်မြောက်နေ့ အခမ်းအနားသို့ NUG ကာကွယ်ရေးက ဂုဏ်ပြုသဝဏ်လွှာပေးပို့ခဲ့ရာ၌ အထက်ပါအတိုင်း ဖော်ပြခဲ့ခြင်းဖြစ်သည်။
လက်ရှိ ပြည်သူလူထုတရပ်လုံး ကြုံတွေ့ခံစားနေရသည့် မတရားအာဏာသိမ်း အကြမ်းဖက် စစ်တပ်၏ အဆုံးစွန်သော ရက်စက်ကြမ်းကြုတ်မှုများနှင့် နှစ်ကာလပေါင်းများစွာသော မတရား ဖိနှိပ်မှုများကို အဆုံးသတ်အမြစ်ဖြတ်ရန်မှာ အကြမ်းဖက်စစ်တပ်အား အပြီးတိုင်ဖယ်ရှားပြီး ဖက်ဒရယ် ဒီမိုကရေစီပြည်ထောင်စုတရပ်ကို အားလုံးအတူတကွ လက်တွဲထူထောင် ကြရမည်ဖြစ်ကြောင်း သဝဏ်လွှာ၌ ဖော်ပြထားသည်။
” ဝ ပြည်နယ်၏ ရရှိပြီးသော တည်ငြိမ်အေးချမ်းမှု၊ ဒေသဖွံဖြိုးမှု၊ လူမှုစီးပွားဘဝ ဖွံ့ဖြိုးတိုးတက်မှုများကို ဆက်လက်ခိုင်မာမြင့်မားတိုးတက်စေရန် ဝ ပြည်သွေးစည်းညီညွတ်ရေးပါတီ၊ ဝ ပြည်သွေးစည်းညီညွတ်ရေးတပ်မတော်၊ ဝ ပြည်နယ် ပြည်သူ့အစိုးရတို့သည် ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဌာန်းခွင့်များနှင့်အညီ ဦးဆောင်ကြိုးပမ်း ဆောင်ရွက် နိုင်ပါစေကြောင်းနှင့် အနာဂတ်ဖက်ဒရယ်ဒီမိုကရေစီပြည်ထောင်စုကို အတူတကွ လက်တွဲပုံဖော် တည်ထောင်ကြရန် လေးစားစွာဖြင့် တိုက်တွန်းနှိုးဆော်လျက် ယနေ့ ၂၀၂၃ ခုနှစ် ဧပြီလ (၁၇) ရက်နေ့တွင် ကျရောက်သော ဝ ပြည်နယ်၏ ငြိမ်းချမ်းရေးတည်ဆောက်မှု (၃၄) နှစ်ပြည့် အခမ်းအနားသို့ ဤသဝဏ်လွှာကို ဂုဏ်ယူစွာဖြင့် ပေးပို့အပ်ပါသည်”ဟု ကာကွယ်ရေးဝန်ကြီးဌာန၏ သဝဏ်လွှာ၌ ရေးသားထားသည်။
လက်နက်နှင့် လူအင်အား ကြီးမားသည့် တိုင်းရင်းသားလက်နက်ကိုင်အဖွဲ့ဖြစ်သည့် UWSA သည် အာဏာသိမ်းစစ်ကောင်စီတပ်နှင့် ငြိမ်းချမ်းရေးဆွေးနွေးနေသည့် လက်နက်ကိုင်တပ်ဖွဲ့တစ်ခုဖြစ်သည်။
