ကချင်ပြည်နယ် ဖားကန့်မြို့နယ် ဆယ်ဇင်းဒေသ ၌ ယမန်နေ့က ကချင်လွတ်လပ်ရေးတပ်မတော် (KIA)၊ ပြည်သူ့ကာကွယ်ရေးတပ်(PDF) ပူးပေါင်းအဖွဲ့နှင့် စစ်ကောင်စီလက်အောက်ခံ ရှမ်းနီတပ်ဖွဲ့ (SNA)တို့ တိုက်ပွဲဖြစ်ပွားခဲ့ကြောင်း ဆယ်ဇင်းဒေသခံက ပြောသည်။
ဧပြီ ၁၇ရက် နံနက် ၄နာရီခန့်တွင် ဆယ်ဇင်းဒေသ နံ့ကသာနှင့် ပန်ချယ်ကျေးရွာအကြား၌ တိုက်ပွဲဖြစ်ခဲ့သည်ဟု ဆိုသည်။
“မနေ့က ၁၇ရက်နေ့ ၄နာရီလောက်မှာ SNAနဲ့ KIA/PDFနဲ့ တိုက်ပွဲဖြစ်တယ်။ နံနက် ၁၀နာရီလောက် မှာ ပြီးသွားတယ်။ KIAနဲ့ PDF ဘက်က အထိအခိုက်မရှိပါဘူး။ SNA ဘက်ကတော့ ၄၀ကျော်လောက်ကျတယ်ကြားတယ်”ဟု ဒေသခံက ပြောသည်။ SNA တပ်ဖွဲ့ဝင်များ ထိခိုက်သေဆုံးအခြေအနေကို သီးခြားအတည်မပြုနိုင်သေးပေ။
အဆိုပါ ဒေသ၌ ယခင်ကလည်း တိုက်ပွဲများ ဖြစ်ပွားခဲ့ရာ SNA တပ်စခန်းအချို့ကို KIA/PDFက တိုက်ခိုက်သိမ်းပိုက်ခဲ့သည်ဟု ဆိုသည်။
“ဘာကြောင့်တိုက်ပွဲဖြစ်တာလဲဆိုတော့ သူတို့က အင်အားတိုးပြီး အရှေ့ကို တိုးခဲ့လို့ပေါ့။ ရှေ့တိုးတယ်ဆိုတာဒီဘက်က KIAနဲ့ PDFနယ်မြေကို ပြန်သိမ်းချင်တဲ့သဘောပေါ့။ သူတို့ လက်လွှတ် ထားရတဲ့နေရာကို ပြန်သိမ်းချင်လို့ တိုက်ပွဲက ဖြစ်ရတာပါ။ ပြောမယ်ဆို သူတို့ SNAကလည်း စစ်ကောင်စီနဲ့ အတူတူပဲလေ။ အတူတူပဲဖြစ်တဲ့အတွက်ကြောင့် တစ်နိုင်ငံလုံး အာဏာရှင်ကို တော်လှန်နေတဲ့အခါသူတို့ကိုပါ တော်လှန်ရမှာ။သူတို့လည်း စစ်ကောင်စီနဲ့ အတူတူပဲ”ဟု ဆယ်ဇင်းဒေသခံက ပြောသည်။
သို့သော် ယနေ့ ဒေသအတွင်း၌ စစ်ရေးအခြေအနေ ငြိမ်နေဆဲဖြစ်ကြောင်း ဒေသခံက ပြောသည်။
