လက်နက်ခဲယမ်းအချို့ရ
ကရင်အမျိုးသားအစည်းအရုံး(KNU)နယ်မြေ မြ၀တီမြို့နယ်အတွင်း၌ ကော်ဘရာစစ်ကြောင်းပါဝင်သည့် ပူးပေါင်းတပ်ဖွဲ့နှင့် စစ်ကောင်စီတပ်တို့ တိုက်ပွဲများ တောက်လျှောက်ဖြစ်ပွားလျက် ရှိရာ ယမန်နေ့တိုက်ပွဲတွင် စစ်ကောင်စီတပ်မှ ဗိုလ်မှူး တစ်ဦး အပါအဝင် ငါးဦး သေဆုံးခဲ့ကြောင်း ကော်ဘရာ စစ်ကြောင်းက ထုတ်ပြန်သည်။
သေဆုံးခဲ့သည့် စစ်ကောင်စီတပ်ဖွဲ့ဝင်များမှာ တပ်မ(၄၄)လက်အောက်ခံ ခမရ(၂၀၇)မှဖြစ်သည်ဟု ဖော်ပြသည်။
ထို့ပြင် စစ်ကောင်စီတပ်ဖွဲ့ဝင် ခြောက်ဦး ဒဏ်ရာရခဲ့ကြောင်း၊ စစ်ကောင်စီတပ်က လေကြောင်းပစ်ကူပေးတိုက်ခိုက်ခဲ့သော်လည်း ပူးပေါင်းတပ်ဖွဲ့မှ ဒဏ်ရာရသူမရှိကြောင်း အသိပေးသည်။
စစ်ကောင်စီတပ်သည် ယမန်နေ့ (ဧပြီ ၂၉ရက်) တွင် လက်နက်ကြီးဖြင့်အကြိမ်ရေ (၉၀)အထက်၊ Missile ဖြင့် (၈)ကြိမ် ပစ်ခတ်ပြီး စစ်ကြောင်းထိုးဝင်ရောက်ရန် ကြိုးစားခဲ့ခြင်းဖြစ်ပြီး နယ်မြေလုံခြုံရေးယူထားသော ပူးပေါင်းတပ်ဖွဲ့၏ တိုက်ခိုက် မှုကို ခံခဲ့ရခြင်းဖြစ်သည်ဟု ထုတ်ပြန်သည်။
စစ်ကောင်စီတပ်ထံမှ ကပစ ကျည် (၆၇)တောင့်၊ MA5 (၁)လက်၊ MA5 ကျည်ဘောက် (၁)ဘောက်၊ 9mm ကျည် (၁၅) တောင့်၊ MAကျည်ဘောက် (၄)ဘောက်၊ စကားပြောစက် (၂)လုံး၊ အီနာဂါ (၄)လုံး၊ RPG (၃)လုံး၊ RPG ပို့ယမ်း (၃)တောင့်၊ ဓား (၁)လက်၊ Jammer ကျောပိုးစက် (၁)လုံးတို့အား သိမ်းဆည်းရမိခဲ့ကြောင်း ဖော်ပြသည်။
