၅၀၅(က) နဲ့ မတရားဖမ်းဆီးထောင်ချခံရသူ ၂,၀၀၀ ကျော်ကို ဒီနေ့ လွှတ်ပေးမယ်လို့ကြေညာထားတာကြောင့် အကျဥ်းထောင်အသီးသီးမှာ မိသားစုဝင်တွေ သွားရောက်စောင့်ဆိုင်းနေကြပါတယ်။
အင်းစိန်အကျဥ်းထောင်ရှေ့မှာလည်း လွတ်မယ်လို့အကြောင်းကြားခံရတဲ့၊ သတင်းရထားတဲ့ မိသားစုဝင်တွေလာရောက်စောင့်ဆိုင်းနေကြပါတယ်။
ဒီနေ့ မေ ၃ ရက်မှာ ပြန်လည်လွတ်မြောက်လာမယ့်သူအများစုဟာ မတရားချခံထားရတဲ့ ထောင်ဒဏ် ပြည့်ဖို့ လပိုင်းသာ လိုတဲ့သူတွေဖြစ်တယ်လို့လည်း အကျဉ်းထောင်အသိုင်းအဝိုင်းကနေ စုံစမ်းသိရပါတယ်။
ဆူပူအောင်လှုံဆော်မှု ရာဇသတ်ကြီး ပုဒ်မ ၅၀၅ (က)နဲ့ မတရားဖမ်းဆီးထောင်ချခံထားရသူတွေထဲက ၂,၀၀၀ ကျော်ကို ဒီနေ့ မှာကျရောက်တဲ့ ကဆုန်လပြည့်နေ့ မှာ လွတ်ငြိမ်းပေးမယ်လို့ စစ်ကောင်စီက ကြေညာပါတယ်။
အကျဉ်းထောင်၊ အချုပ်ထောင်နဲ့ ရဲဘက်စခန်းတွေမှာ အကျဉ်းကျခံနေရတဲ့ ၅၀၅ (က) ၂၁၅၃ ဦးကို နောက်တစ်ကြိမ် ပြစ်မှုကျုးလွန်ရင် ကြွေးကျန် ထောင်ဒဏ်ပါ ထပ်ပေါင်း ကျခံရမယ်ဆိုတဲ့ သတ်မှတ်ချက်နဲ့စစ်ကောင်စီက လွှတ်တာပါ။
အာဏာသိမ်းတာကို ဆန့်ကျင်တဲ့ဆန္ဒပြပွဲမှာ ဖမ်းခံရသူတွေ၊ ဆန္ဒပြသူတွေကို အားပေးထောက်ခံသူတွေ၊ လူမှုကွန်ရက်မှာ စစ်အာဏာရှင်ကို ဆန့်ကျင်ကြောင်းရေးသားသူတွေ၊ စစ်ကောင်စီလက်ချက်ကြောင့် သေဆုံးခဲ့ရသူအရပ်သားတွေအတွက် ဝမ်းနည်းကြောင်း လှုမှုကွန်ရက်မှာဝေမျှသူတွေကို စစ်ကောင်စီက ဆူပူအောင်လှုံဆော်မှု ၅၀၅(က) နဲ့ စွပ်စွဲ ဖမ်းဆီးထောင်ချတာတွေလုပ်ခဲ့တာပါ။
၅၀၅(က)နဲ့ ဖမ်းခံရသူတွေကို စစ်ကောင်စီဟာအဲဒီ ပုဒ်မပြဌာန်းချက်အရ အမြင့်ဆုံးချလို့ရတဲ့ ထောင်ဒဏ် ၃ နှစ် ထိ ချခဲ့ပါတယ်။
