စစ်ကောင်စီတပ် ခုနစ်ဦးသေပြီး ၁၃ဦးခန့်ဒဏ်ရာရ၊ PDF ရဲဘော်နှစ်ဦးကျဆုံး
ကယားပြည်နယ်(ကရင်နီ) ဘောလခဲမြို့ပေါ်ရှိ စစ်ကောင်စီတပ်စွဲရာ နေရာလေးနေရာကို ပူးပေါင်းတပ် ဖွဲ့များနှင့်အတူ ၀င်ရောက်စီးနင်းတိုက်ခိုက်ခဲ့ကြောင်း ဘောလခဲ ပြည်သူကာကွယ်ရေးတပ်ဖွဲ့(BPDF) အမှတ် – ၁၁၀၅ တပ်ရင်းမှ တာ၀န်ရှိသူတစ်ဦးက ပြောကြားသည်။
စီးနင်းတိုက်ခိုက်ခဲ့သည့် မြို့ပေါ် နေရာလေးခုမှာ ဘေလခဲမြို့မရဲစခန်း၊လူဝင်မှုကြီးကြပ်ရေးဦးစီးဌာန (လ၀က)ရုံး၊ စစ်မှုထမ်းဟောင်းရုံးနှင့် ရုပ်သံလွှင့်သည့်နေရာတို့ကို BPDF တပ်ရင်း – ၁၁၀၅၊ ဖားဆောင်းပြည်သူ့ကာကွယ်ရေး တပ်ဖွဲ့ (PPDF) အမှတ် -၁၁၀၈ တပ်ရင်းတို့ ပါဝင်သည့် ဘောလခဲခရိုင်ပူးပေါင်းဗျူဟာ စစ်ကြောင်းမှ ၀င်ရောက်စီးနင်းခဲ့ခြင်းဖြစ်သည်။
စီးနင်းတိုက်ခိုက်မှုကို မေလ ၁ ရက်နံနက် ၄ နာရီ ၅၀ မိနစ်တွင် စတင်လုပ်ဆောင်ခဲ့ခြင်းဖြစ်ပြီး အပြန် အလှန်ပစ်ခတ်မှု ၂နာရီကျော်ကြာမြင့်ခဲ့ကြောင်း အမှတ် – ၁၁၀၅ တပ်ရင်းမှ တာ၀န်ရှိသူတစ်ဦးက ပြောကြားသည်။
စစ်မှုထမ်းဟောင်းရုံးအား မီးရှို့ဖျက်စီးနိုင်ခဲ့ပြီး လ.ဝ.က ရုံးလည်းဝင်ရောက်ရှင်းလင်းခဲ့ရာ စစ်ကောင်စီ၏ အမှတ် (၄၃၀)တပ်ရင်းမှ စစ်ကူများရောက်ရှိလာသဖြင့် ပြန်လည်ဆုတ်ခွာပေးခဲ့ရသည်ဟု ဆိုသည်။
ထိုသို့ စီးနင်းတိုက်ခိုက်မှုများတွင် စစ်ကောင်စီဖက်မှ ခုနစ်ဦးသေဆုံးခဲ့ပြီး ၁၃ ဦးထက်မနည်း ဒဏ်ရာရရှိခဲ့ကာ စစ်ကောင်စီဖက်မှ သေဆုံးအလောင်းများနှင့် ဒဏ်ရာရလူများအားပြန်လည်ဆွဲယူသွားခဲ့ပြီး မေလ၂ ရက်တွင် ဒဏ်ရာရလူနာများအား ရဟတ်ယာဉ်ဖြင့်လာရောက် ခေါ် ယူသွားခဲ့ကြောင်း အသိပေးသည်။
တိုက်ပွဲတွင် စစ်ကောင်စီထံမှ G4 တစ်လက်၊ AK 22 တစ်လက်၊ G4 ကျည်ဘောက် ၆ ဘောက်၊ AK ကျည်ဘောက် ၃ ဘောက်၊လက်ပစ်ဗုံး တစ်လုံးနှင့် ကျည်ဆံအချို့တို့အားသိမ်းဆည်းရမိခဲ့သည်ဟု ဆိုသည်။
“မြို့တွင်း နေရာအနှံဖြစ်တာကတော့ ပထမဦးဆုံး အကြိမ်ပါပဲဗျ။ ယခင်က မြို့အနီးဝန်းကျင်ကို ပစ်ခတ်မှုတွေတော့ ရှိခဲ့ပါတယ်”ဟု ဘောလခဲ ပြည်သူ့ကာကွယ်ရေးတပ်ဖွဲ့ BPDF တပ်ရင်း – ၁၁၀၅ မှ တာ၀န်ရှိသူတစ်ဦးက ပြောသည်။
အထက်ပါ စစ်တပ်အထိုင်ချနေရာများအား စီးနင်းတိုက်ခိုက်မှုတွင် ဘောလခဲပြည်သူ့ကာကွယ် ရေးတပ်ဖွဲ့ (BPDF) အမှတ်-၁၁၀၅ တပ်ရင်း မှ ရဲဘော် ၂ ဦး ကျဆုံးခဲ့ပြီး တစ်ဦး ဒဏ်ရာပြင်းထန် ရရှိခဲ့ကြောင်း အသိပေးထားသည်။
