တော်လှန်ရေးရဲဘော် တစ်ဦးကျဆုံးပြီး ၁၀ဦးဒဏ်ရာရဟု အသိပေး
ကရင်ပြည်နယ် မြဝတီမြို့နယ် လက်ခတ်တောင်နှင့် ကျောက်မိုင်းဒေသတို့ တိုက်ပွဲဆက်လက် ဖြစ်ပွားခဲ့ကြောင်း ကော်ဘရာစစ်ကြောင်းက ယမန်နေ့တွင် ထုတ်ပြန်ခဲ့ပြီး မေလ ၁၁ရက်မှ ၁၃ရက်အထိ ဖြစ်ပွားခဲ့သည့် စစ်ရေးအခြေအနေအကျဉ်းကို ဖော်ပြသည်။
ကရင်အမျိုးသားအစည်းအရုံး(KNU/KNLA) တပ်မဟာ(၆) ကော်ဘရာစစ်ကြောင်း(၁)၊ ကျားသစ်နက်စစ်ကြောင်း၊ Federal Wings၊ Golden Eagle စသည့် ပူးပေါင်းတပ်ဖွဲ့များနှင့် စစ်ကောင်စီ၏ ခမရ(၁၁၈)၊ လ(၈)၊ ခလရ(၂၇၅)၊ BGF(၁၀၁၉)တပ်ရင်းတို့ ရင်ဆိုင်တိုက်ပွဲများ ဖြစ်ပွားခဲ့သည်ဟု ဆိုသည်။
မေလ ၁၁ရက်က တစ်နေကုန်တိုက်ပွဲဖြစ်ပွားခဲ့ရာ ရန်သူ့ဘက်ကသေဆုံးဒဏ်ရာရအား စိစစ်ဆဲဖြစ်ကြောင်း ထုတ်ပြန်ခဲ့ပြီး ပူးပေါင်းတပ်မှ ၂ဦး ဒဏ်ရာရခဲ့သည်ဟု အသိပေးသည်။စစ်ကောင်စီတပ်ဘက်က လက်နက်ကြီးအများအပြား ပစ်ခတ်ခဲ့သည်ဟု ဆိုသည်။
မေလ ၁၂ရက်တွင်လည်း ပူးပေါင်းတပ်ဖွဲ့နေရာယူထားသည့် ကင်းနေရာသို့ စစ်ကြောင်းထိုးလာသည့် စစ်ကောင်စီတပ်နှင့် တိုက်ပွဲဖြစ်ပြီး စစ်ကောင်စီတပ်ဘက်က ၄ဦး သေဆုံးကာ ၁၂ဦး ဒဏ်ရာရခဲ့ကြောင်း ဖော်ပြသည်။ ယင်းတိုက်ပွဲအတွင်း ပူးပေါင်းတပ်မှ ၄ဦး ဒဏ်ရာရခဲ့သည်ဟုဆိုသည်။
မေလ ၁၃ရက်တွင်လည်း စစ်ကောင်စီဘက်မှ ပူးပေါင်းတပ်ဖွဲ့များ စိုးမိုးနေရာယူထားသော နေရာများသို့ လက်နက်ကြီးဖြင့် ဆက်တိုက်ပစ်ခတ်ခဲ့ကြောင်း၊ တိုက်ပွဲဆက်လက်ဖြစ်ပွားခဲ့ရာ စစ်ကောင်စီတပ်မှ ၄ဦး သေဆုံးကာ ၁၅ဦး ဒဏ်ရာရခဲ့ကြောင်း ထုတ်ပြန်သည်။
ရန်သူ၏ လက်နက်ကြီး အဆက်မပြတ်ပစ်ခတ်မှုကြောင့် ပူးပေါင်းတပ်ဖွဲ့မှ ရဲဘော် တစ်ဦး ကျဆုံးကာ ၄ဦး ထိခိုက်ဒဏ်ရာရခဲ့သည်ဟု ဖော်ပြသည်။
KNUနယ်မြေ မြတီမြို့နှင့်အနီးတဝိုက်ဒေသများတွင် ကော်ဘရာစစ်ကြောင်းပါဝင်သည့် ပူးပေါင်းတပ်နှင့် စစ်ကောင်စီတပ်တို့ မတ်လကုန်ပိုင်းမှစ၍ တိုက်ပွဲများ မကြာခဏ ဖြစ်ပွားလျက်ရှိသည်။
