စစ်ကိုင်းတိုင်း၊ စစ်ကိုင်းမြို့နယ်မြောက်ခြမ်း၌ တိုက်ပွဲများဆက်ဖြစ်နေပြီး ပဒူကျေးရွာကို စစ်ကောင်စီတပ် က Mi-35 ရဟတ်ယာဥ်ဖြင့် ပစ်ခတ်တိုက်ခိုက်ခဲ့ကြောင်း ဒေသခံများက ပြောသည်။
မေလ ၁၉ ရက်ကတည်းက စစ်ကိုင်းမြို့နယ်ရှိ ပဒူရွာဝန်းကျင်တွင် စစ်ကောင်စီတပ်နှင့် ဒေသကာကွယ်ရေးအဖွဲ့များ တိုက်ပွဲများဖြစ်ပွားခဲ့သည်။
ယနေ့ (မေလ ၂၂ ရက်) နေ့လည်၁၂ နာရီခန့်က စစ်ကောင်စီတပ်က Mi-35 ရဟတ်ယာဥ်ဖြင့် လာရောက်ပစ်ခတ်ခဲ့ပြီး ရွာသူ၊ ရွာသားများ ထွက်ပြေးနေရ၍ ထိခိုက်မှုအခြေအနေ မသိရသေးကြောင်း ဒေသခံများက ပြောသည်။
“တစ်နာရီလောက်တော့ ကြာတယ်ဗျ။ သေတာပြုတာတော့ မကြားသေးဘူး။ ပျက်စီးမှုကတော့ ရှိလိမ့်မယ်။”ဟု ပဒူရွာ စစ်ဘေးရှောင်ပြည်သူတစ်ဦးက ပြောသည်။
စစ်ကောင်စီတပ်သည် မေလ ၁၉ ရက် နံနက်ပိုင်းကစတင်ကာ ပဒူရွာသို့ ထိုးစစ်ဆင်ခဲ့ပြီး ဒေသတွင်းပြည်သူ့ကာကွယ်ရေးပူးပေါင်းတပ်ဖွဲ့များနှင့် ပဒူ၊ ကန်ကြီးကုန်း၊ဆည်လေးကျေးရွာတဝိုက်တွင် တိုက်ပွဲများ ဆက်တိုက်ဖြစ်ပွားခဲ့သည်။
အဆိုပါ တိုက်ပွဲများကြောင့် စစ်ကိုင်းနယ်ရှိ ကျေးရွာ (၈)ရွာထက်မနည်း ထွက်ပြေးတိမ်းရှောင်နေရပြီး စစ်ဘေးရှောင်များ၏ ယာဉ်တိမ်းမှောက်၍ အမျိုးသမီးတစ်ဦးသေဆုံးကာ ကလေးငယ်တစ်ဦးလည်း အုတ်တံတိုင်းပိသေဆုံးခဲ့သည်။
ထို့အပြင် ပြည်သူ့ကာကွယ်ရေးတပ် စခန်းတစ်ခုလည်း မီးရှို့ဖျက်ဆီးခံခဲ့ရပြီး စစ်အုပ်စုထောင်ထားသော မိုင်းနင်းမိ၍ ပြည်သူ့ကာကွယ်ရေးရဲဘော် လေးဦး ကျဆုံးခဲ့ကြောင်း၊စစ်အုပ်စုဘက်ကလည်း အထိနာခဲ့ကြောင်း ကျောက်ဆည် K.S PDF အဖွဲ့က အသိပေးသည်။
