ပုဂံဒေသက ထင်ရှားတဲ့ ဗူးဘုရားဟာ မနေ့ညပိုင်း ၉ နာရီခွဲခန့်က မိုးကြိုးထိမှန်ပြီး ထိခိုက်ပျက်စီးမှုရှိခဲ့ပါတယ်။
မနေ့ညပိုင်း ပုဂံမှာ မိုးကြိုးပစ်ပြီး မိုးရွာသွန်းမှုရှိတယ်လို့ ဒေသခံတွေဆီကသိရပါတယ်။ ဧရာဝတီမြစ်ဘေးက ဗူးဘုရားလည်း မိုးကြိုးမှန်ခဲ့တယ်လို့ ဒေသခံတွေပြောပါတယ်။
မိုးကြိုးကြောင့် ဘုရားလုံးပတ်တော်နဲ့ ထီးတော် ထိခိုက်သွားတယ်လို့ဆိုပါတယ်။
စစ်ကောင်စီဘက်ကတော့ ဧရာဝတီရေပြင်ကို မိုးကြိုးပစ်ချိန် မြစ်ကမ်းစပ်က ဗူးဘုရားလည်း စက်ကွင်းမိသွားတာဖြစ်ပြီး ဘုရားလုံးပတ်တော်မှာ ၁လက်မ ခွဲအရွယ် အပေါက်ရာ ၂ ခု ဖြစ်ပေါ် သလို အက်ရာထင်သွားတယ်လို့ ဆိုထားပါတယ်။
ဒါအပြင် စိန်ဖူးတော် အောက်ခံ ကြာဖတ် နဲ့ ဌက်ပျောဖူးကြာဖတ် ပဲ့ကျသွားခဲ့ပြီး ထီးတော်မှာ ချိတ်ဆွဲထားတဲ့ ကြေးခေါင်းလောင်းတွေ အမဲရောင်ပြောင်းသွားတယ်လို့ စစ်ကောင်စီက ဖော်ပြပါတယ်။
လုံးပတ်တော်မှာ ပေါက်သွားတဲ့အပေါက်ကနေ မိုးရေစိမ့်ဝင်နိုင်လို့ ဒီနေ့ကစတင်ပြီးပြုပြင်မယ်လို့လည်းသိရပါတယ်။
ဒေသခံတွေပြောပြချက်အရ ဗူးဘုရားမှာ မိုးကြိုးလွှဲတွေ တပ်ဆင်ထားတယ်လို့လည်းသိရပါတယ်။
ဗူးဘုရားဟာ ပုဂံရာဇဝင်တွေမှာ ပျုစောထီးမင်း တည်ထားကိုးကွယ်ခဲ့တယ်လို့ဖော်ပြထားပါတယ်။
