စစ်ကိုင်းတိုင်း၊ မုံရွာမြို့နယ်ရှိ ရေကန်စုကျေးရွာကို စစ်ကောင်စီတပ်က ဝင်ရောက်စီးနင်းပြီး ကလေးတစ်ဦးအပါအဝင် ဒေသခံခြောက်ဦးကို သတ်ဖြတ်သွားကြောင်း သတင်းရရှိသည်။
ယမန်နေ့(ဇွန်လ ၇ရက်) နံနက် ၅ နာရီခန့်က မုံရွာမြို့၊ ရောင်တော်ထုံးရွာနှင့် ရေကန်စုကျေးရွာကို စစ်ကောင်စီတပ်က လက်နက်ကြီးများဖြင့် ပစ်ခတ်ဝင်ရောက်ခဲ့ကြောင်း၊ ထို့နောက် ရေကန်စုကျေးရွာမှ အမျိုးသား သုံးဦး၊ အမျိုးသမီး နှစ်ဦးနှင့် ကလေးတစ်ဦးကို ပစ်ခတ်သတ်ဖြတ်သွားကြောင်း ဒေသခံများက ပြောသည်။
သေဆုံးသူများအနက် PDF ရဲဘော်အချို့ ပါဝင်သည်ဟု ပြောဆိုနေကြသော်လည်း လူထုနွေဦးက အတည်ပြုနိုင်ခြင်း မရှိသေးပေ။
“ဒလန်ကြောင့်လည်းပါတယ်။ စခန်းမှာလက်နက်မရှိချိန် လူနည်းနေတဲ့အချိန်ကို အလစ်ဝင်ပစ်တယ်။လက်နက်ကြီးတွေနဲ့ပစ်တယ်။ ဘာမှမဆိုင်တဲ့သူတွေ မိန်းကလေးနှစ်ဦး ယောကျာ်းလေးတစ်ဦးကိုလည်း မီးရှို့သွားတာ”ဟု ဒေသခံတစ်ဦးက ပြောသည်။
ထိုဖြစ်စဥ်နှင့်ပတ်သက်၍ ဒေသတွင်း PDF အဖွဲ့များဘက်ကလည်း တစ်စုံတစ်ရာထုတ်ပြန်အသိပေးခြင်း မရှိသေးပေ။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)