မြန်မာပြည်အရှေ့တောင်ပိုင်း ဒေသတွေက ကျေးရွာတွေမှာ အရပ်သားပြည်သူတွေ ကို ဦးတည်ပစ်မှတ်ထားတဲ့ စစ်ကောင်စီတပ်ရဲ့ တိုက်ခိုက်မှုတွေကြောင့် ဆိုးရွားတဲ့အကျိုးဆက်တွေ ဖြစ်ပေါ် စေတယ်လို့ ကရင်လူ့အခွင့်အရေးအဖွဲ့ (KHRG) က ဇွန်လ ၁၆ ရက်မှာထုတ်ပြန်တဲ့အစီရင်ခံမှာဖော်ပြပါတယ်။
အရှေ့တောင်ပိုင်းဒေသတွေမှာ ကရင်ပြည်နယ်၊ ကယားပြည်နယ်၊မွန်ပြည်နယ်၊ တနင်္သာရီတိုင်း၊ ပဲခူးတိုင်းအရှေ့ခြမ်း၊ ရှမ်းပြည်နယ်အရှေ့ပိုင်း တို့ပါဝင်ကြပါတယ်။
ဇွန်လ ၁၆ ရက်ကထုတ်ပြန်တဲ့ KHRG ရဲ့အစီရင်ခံစာကတော့ မြန်မာပြည်အရှေ့တောင်ပိုင်း ရှိ ရွာတွေအပေါ် စစ်တပ်ရဲ့အကြမ်းဖက်မှုတွေကို ဖော်ထုတ် တဲ့အစီရင်ခံစာပါ။
အဲဒီအစီရင်ခံစာမှာ စစ်တပ်က အရပ်သားပြည်သူတွေကို ပစ်မှတ်ထားပြီးသတ်ဖြတ်တာ ၊လေကြောင်းကနေ တိုက်ခိုက်တာ ၊ လက်နက်ကြီး လက်နက်ငယ်နဲ့ ရမ်းသမ်းပစ်ခတ်တာ ၊ အဓမ္မဖမ်းဆီးတာ ၊လူထုရဲ့ပိုင်ဆိုင်မှုကို ဖျက်ဆီးတာတွေက ဒေသတွင်းလူမှုအသိုက်အဝန်းအပေါ် ဆိုးရွားတဲ့အကျိုးဆက်တွေဖြစ်ပေါ်စေတယ်လို့ ဆိုထားပါတယ်။
“ဆိုးရွားတဲ့လူ့အခွင့်အရေးချိုးဖောက်မှုတွေ စစ်ရာဇဝတ်မှုတွေ လူသားမျိုးနွယ်အပေါ် ကျူးလွန်တဲ့ရာဇဝတ်မှုတွေ ဒါတွေကို နောက်ဆက်တွဲအနေနဲ့ ဖြစ်ပွားစေတယ်ပေါ့ ” လို့ KHRG ရဲ့ စည်းရုံးလှုံဆော်ရေး တာဝန်ခံ စောနန္ဒဆူးက ဆိုပါတယ်။
မြန်မာပြည်အရှေ့တောင်ပိုင်းက ပြည်သူတွေဟာယခင်စစ်အစိုးရ လက်ထက်က ကြုံခဲ့ရတာတွေကို စစ်တပ်ရဲ့တကျော့ပြန်အာဏာသိမ်းမှုအပြီးမှာ ဆက်လက်ကြုံတွေ့နေရတယ်လို့ KHRG က အစီရင်ခံစာမှာဖော်ပြပါတယ်။
အရပ်သားပြည်သူတွေ မတရားဖမ်းခံရတာ ၊ညှင်းပန်းနှိပ်စက်ခံရတာ ၊သတ်ဖြတ်ခံရတာနဲ့ ရွာလုံးကျွတ်မီးရှို့ခံရတာတွေဆက်ဖြစ်နေတုန်းပဲလို့ KHRG ရဲ့ စည်းရုံးလှုံဆော်ရေး တာဝန်ခံ စောနန္ဒဆူးကပြောပါတယ်။
