ကရင်နီ(ကယား)ပြည်နယ် လွိုင်ကော်မြို့နယ်ကို စစ်ကောင်စီတပ်က ဖုန်းလိုင်းနှင့် အင်တာနက်လိုင်း ဖြတ်တောက်ထားကြောင်း ကရင်နီဒေသခံ အချို့က ပြောသည်။
လွိုင်ကော်တွင် ယနေ့ (ဇွန်လ ၂၇ရက်)နံနက်ပိုင်းမှစ၍ တယ်လီနော(ATOM)၊ အော်ရီဒူး ဖုန်းများကို အင်တာနက်လိုင်း၊ ဖုန်းလိုင်းများဖြတ်တောက် ထားခြင်းဖြစ်သည်ဟု ဒေသခံများက ပြောသည်။
သို့သော် MPT မှာ ဖုန်းလိုင်း အသုံးပြု၍ ရသေးပြီး Mytel တစ်ခုသာ အင်တာနက်ရသေးသည်ဟုဆိုသည်။
မြို့သိမ်းတိုက်ပွဲကဲ့သို့ စစ်ဆင်ရေးများရှိနေသည့် ကရင်နီတပ်ပေါင်စု၏ သတင်းစီးဆင်းမှုများ နှေးကွေးစေရန်စစ်ကောင်စီက လုပ်ဆောင်ခြင်းဟု ဒေသခံများက ဆိုသည်။
“သူတို့ ဘာသတင်းတွေကြားထားလို့လဲတော့မသိဘူးဗျ။ ကြောက်အားလန့်အားတွေနဲ့ ဂယောင်ချောက်ချားဖြစ်နေတာလို့ပဲမြင်မိတယ်။အခု မြို့ထဲမှာတာ ဖုန်းကနေ တိုင်တစ်တိုင်ပဲ တက်တော့တယ်”ဟု လွိုင်ကော်မြို့ခံတစ်ဦးက လူထုနွေဦးသို့ပြောသည်။
ထိုသို့ စစ်ကောင်စီ၏ ဆက်သွယ်ရေးလိုင်းများ ပိတ်ပစ်ခြင်းသည် အာဏာသိမ်းပြီး နှစ်လအတွင်းနောက်ပိုင်း ပထမဆုံးကြုံတွေ့ရခြင်းဟုလည်း ၎င်းက ရှင်းပြသည်။
“Mytel တစ်ခုပဲ ဆက်သွယ်တာရော အင်တာနက်ရော သုံးလို့ရတယ်။ကျန်တဲ့ ဖုန်းလိုင်းတွေအကုန်သုံးစား မရဘူး”ဟု ဒီးမော့ဆိုအခြေစိုက် စစ် ရှောင်ကူညီပေးနေသူတစ်ဦးက ရှင်းပြသည်။
ယင်းနှင့်ပတ်သက်၍ ကရင်နီဒေသခံတစ်ဦးက လွိုင်ကော်၌ ဖုန်းလိုင်း၊ အင်တာနက်လိုင်း ဖြတ် တောက်ခံထားရေကြောင်း ပြောကြားပြီး ယင်းသို့လုပ်ဆောင်ခြင်းအပေါ် ပြည်သူများ စိုးရိမ်နေကြရသည်ဟုဆိုသည်။
မယ်စဲ့ဒေသရှိ စစ်ကောင်စီတပ်စခန်းများ တိုက်ခိုက်သိမ်းပိုက်ခံရပြီးနောက် လွိုင်ကော်သို့ စစ်ကောင်စီတပ်က စစ်အင်အားဖြည့်တင်းလျက်ရှိသည်ဟု ကရင်နီစစ်ဘက်တာဝန်ရှိသူ အချို့က ပြောကြားထားသည်။
ထို့အပြင် စစ်ကောင်စီတပ်မိသားစုများကိုလည်း လွိုင်ကော်မှ ရွှေ့ပြောင်းထားကြောင်း ဇွန်လ ၂၈ရက်တွင် တစ်ခုခုထူးခြားမည်ဟု သတင်းလွှင့်ထားရာ ယနေ့(ဇွန်လ ၂၇ရက်)တွင် အင်တာနက်၊ဖုန်းလိုင်းများဖြတ်တောက်လိုက်ခြင်းဖြစ်သည်။
“အဲဒီ ၂၈ရက်နေ့ ထူးမထူးတော့ မသိဘူး။ ဒါပေမဲ့တော့ လိုင်းတွေ လုံး၀ပျောက်သွားပြီ။ ကျနော်ထင်တယ်လေ သူတို့ ကရင်နီမှာ အရှုံးကြီးရှုံးတယ်ပေါ့။ နောက်ပြီးတပ်ရင်း တစ်ရင်းလည်း လက်နက်ချသွားတယ်ကြားတယ်။ ကျနော်ထင်တာကတော့ နဂိုရ်က စစ်အုပ်ချုပ်ရေးနယ်မြေ လေးခုရှိတာ နောက်ထပ် တိုးချဲ့ပြီး တစ်ပြည်နယ်လုံးကို စစ်အုပ်ချုပ်ရေးလုပ်မယ်လို့ထင်တာပဲ” ဟု ကရင်နီဒေသခံက ပြောသည်။
ယခုကဲ့သို့ဖုန်းလိုင်းများ ဖြတ်တောက်ခြင်းမှာ ဒေသတွင်း သတင်းများ မပြန့်စေရန်၊ စစ်ကောင်စီတပ်ရင်းလိုက်လက်နက်ချသည်ဆိုသည့် သတင်း မသိစေရေး အတွက်လည်းဖြစ်နိုင်ကြောင်း ၎င်းက ဆိုသည်။
