ကရင်အမျိုးသားအစည်းအရုံး(KNU) ကာကွယ်ရေးဌာနအောက်ရှိ ကရင်အမျိုးသားလွတ်မြောက်ရေးတပ်မတော်(KNLA)၊ကရင်အမျိုးသားကာကွယ်ရေးတပ်ဖွဲ့(KNDO)နှင့် စစ်ကောင်စီတပ်တို့ ဇွန်လအတွင်း တိုက်ပွဲပေါင်း ၃၄၄ ကြိမ်ဖြစ်ပွားခဲ့ကြောင်း KNLA ဌာနချုပ်က ယမန်နေ့တွင် ထုတ်ပြန်သည်။
၂၀၂၃ ဇွန်လ တစ်လအတွင်း ကြေးနန်းလက်ခံရရှိမှု စာရင်းအရ တိုက်ပွဲဖြစ်ပွားမှု၊ စစ်ကောင်စီတပ်ဖွဲ့ဝင်များ သေဆုံးထိခိုက်မှုနှင့် KNLAတပ်ဖွဲ့ဝင်များ ထိခိုက်ကျဆုံးမှု အခြေအနေများကို ဖော်ပြထားခြင်းဖြစ်သည်။
ဇွန်လအတွင်း တိုက်ပွဲများ၌ စစ်ကောင်စီတပ်ဖွဲ့ဝင် ၄၄၃ဦး သေဆုံးပြီး ၂၃၇ဦးဒဏ်ရာရခဲ့ကြောင်း KNLAက ထုတ်ပြန်သည်။
KNU လက်အောက်ခံ တပ်ဖွဲ့ဝင် ၇ဦး ကျဆုံးခဲ့ပြီး ၁၉ဦး ဒဏ်ရာရခဲ့ကြောင်း အသိပေးထားပြီး ယင်းထိခိုက် ကျဆုံး မှုတွင် ပြည်သူ့ကာကွယ်ရေးတပ်မတော်(PDF) ရဲဘော်များလည်း ပါဝင်ကြောင်း ဖော်ပြထားသည်။
KNLA၏ ထုတ်ပြန်ချက်အရ ယခုနှစ်ဝက်အတွင်း တိုက်ပွဲပေါင်း နှစ်ထောင်ကျော်ဖြစ်ပွားခဲ့ပြီး စစ်ကောင်စီတပ်မှ ၂၃၀၀ကျော် သေဆုံးခဲ့သည် ဟု ဆိုသည်။ KNU ဗဟို သတင်းပြန်ကြားရေးဌာန၏ ထုတ်ပြန်ချက်တွင် ယခုနှစ်ဝက်အတွင်း တိုက်ပွဲကြီးငယ်ပေါင်း ၂၅၀၀ နီးပါးဖြစ်ပွားခဲ့ပြီး စစ်ကောင်စီတပ်မှ တပ်ရင်းမှူး ၅ဦးနှင့် အရာရှိများအပါအဝင် စစ်ကောင်စီတပ်ဖွဲ့ဝင် ၂၆၀၀ ကျော်သေဆုံးခဲ့သည်ဟုဆိုသည်။ KNU အုပ်ချုပ်ရေးပိုင်းနှင့် KNLA စစ်ရေးပိုင်းတို့၏ သတင်းထုတ်ပြန်ချက်တွင် တိုက်ပွဲဖြစ်ပွားမှုနှင့် စစ်ကောင်စီတပ်များသေဆုံးမှု စာရင်း အနည်းငယ် ကွဲလွဲမှုရှိနေသော်လည်း KNLAက ၎င်းတို့ ကြေးနည်းရရှိသည့် အခြေအနေကိုသာ ထုတ်ပြန်ခြင်းဖြစ်၍ အရေအတွက် အနည်းငယ် လျော့နည်းနေခြင်းဖြစ်သည်ကို တွေ့ရသည်။
