ခင်ဦးနယ်တွင် စစ်ကောင်စီတပ်ရန်ကြောင့် ဒေသခံထောင်ချီ ထွက်ပြေးတိမ်းရှောင်

စစ်ကိုင်းတိုင်း၊ ခင်ဦးမြို့နယ်တွင် စစ်ကောင်စီတပ်စစ်ကြောင်းကြောင့် ဒေသခံထောင်နှင့်ချီ ထွက်ပြေးတိမ်းရှောင်နေရကြောင်း ဒေသခံများက ပြောသည်။

ယမန်နေ့ (ဇူလိုင် ၁၅ ရက်) မွန်းလွဲပိုင်းက ရွှေဘိုမြို့နယ်၊ ခွန်တောင်ကြီး ပျူစောထီးရွာနှင့် ညောင်ပင်သာ စိုက်ပျိုးရေးသိပ္ပံကျောင်းမှ စစ်ကောင်စီတပ်သား အင်အား ၁၀၀ကျော်ဖြင့် စစ်ကြောင်းထိုးလာခဲ့ခြင်း ဖြစ်သည်။

ညနေ ၃နာရီခန့်တွင် စစ်ကောင်စီတပ်သည် ခင်ဦးနယ် အနောက်တောင်ခြမ်း၊ ရေဦး – ညောင်ပင်သာ – ရွှေဘို ကားလမ်းဘေးရှိ တဲဘိုပင်ကျေးရွာသို့ လက်နက်ကြီး၊ ငယ်များဖြင့် ပစ်ခတ်ဝင်ရောက်ခဲ့သည်။

အဆိုပါ စစ်ကောင်စီတပ် စစ်ကြောင်းကြောင့် ခင်ဦးနယ်ရှိ တဲဘိုပင်ကျေးရွာ၊ ကြာပင်အိုင်၊ တပင်ကောင်း(တောင်)ရွာနှင့် ရွှေဘိုနယ် သရက်ပင်ဝန်းကျေးရွာများမှ ဒေသခံ ၃,၀၀၀ကျော်မှာ ထွက်ပြေးတိမ်းရှောင်ခဲ့ရကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က ပြောသည်။

ယမန်နေ့ညက တဲဘိုပင်ကျေးရွာတွင် ညအိပ်တပ်စွဲ၍ ယနေ့(ဇူလိုင် ၁၆ ရက်)တွင် အဆိုပါကျေးရွာမှ လက်နက်ကြီး၊ငယ် ရမ်းသမ်းပစ်ခတ်ကာ ထွက်ခွာခဲ့ကြောင်း ဒေသခံများက ပြောသည်။

အဆိုပါစစ်ကြောင်းသည် သိမ်တော်ကျေးရွာသို့ ဝင်ရောက်နေပြီး ကျေးရွာအနီးရှိ ကျွန်းလည်၊ကျွန်းဆွယ်၊ ရွှေယမင်း၊ ကံကြီးကုန်း၊ မြို့သစ်ရွာများမှ ဒေသခံရှစ်ထောင်ကျော် ထွက်ပြေးတိမ်းရှောင်နေရကြောင်း ခင်ဦးမြို့နယ်သတင်းမှန်ပြန်ကြားရေးအဖွဲ့က ပြောသည်။

“အခြေအနေက မကောင်းဘူး။ ကျွန်တော်တို့နယ်မှာ စစ်ကြောင်းက နှစ်ကြောင်းထိုးနေတယ်။”ဟု ခင်ဦးနယ်ဒေသခံတစ်ဦးက ပြောသည်။

လက်ရှိတွင် ပြည်သူများထိခိုက်မှုမရှိသေးသော်လည်း ထွက်ပြေးတိမ်းရှောင်ရသူများပြားနေ၍ နေထိုင်စားသောက်ရေး အခက်အခဲများရှိနေသည်ဟု သိရသည်။

ဇူလိုင် ၇ရက်ကလည်း ခင်ဦးမြို့နယ်၊ မြကန်ကျေးရွာကို စစ်ကောင်စီတပ်က ဝင်ရောက်ပြီး နေအိမ် နှစ်လုံး မီးရှို့ဖျက်ဆီးကာ အမျိုးသား တစ်ဦးအား မီးရှို့သတ်ဖြတ်ခဲ့သည်။

မြန်မာပြည်တွင် နေရပ်စွန့်ခွာထွက်ပြေးတိမ်းရှောင်သူအရေအတွက် ၁.၈ သန်းကျော် (၁,၈၅၁,၇၀၀)ရှိနေပြီဖြစ်ကြောင်း ဇွန်လကုန်ပိုင်းကထုတ်ပြန်သည့် ကုလသမဂ္ဂဒုက္ခသည်များအေဂျင်စီ UNHCR ၏ အစီရင်ခံစာတွင် ဖော်ပြသည်။

စစ်အာဏာသိမ်းမှုအပြီးတွင် စစ်ကိုင်းတိုင်း၌ နေရပ်စွန့်ခွာသူအရေအတွက် ၇၆၅,၂၀၀ ဦးဖြင့် အများဆုံးဖြစ်ပြီး စစ်အုပ်စု၏ မီးရှို့ဖျက်ဆီးခံရမှုလည်း အများဆုံးခံစားနေရသည့် ဒေသဖြစ်သည်။