အချင်းချင်းမညီညွတ်ပါက ရန်သူစစ်ကောင်စီ ဖြိုခွင်းစရာမလိုဘဲ ပြိုကွဲသွားမည်ဟု KNDO သတိပေး
ကရင်အမျိုးသားအစည်းအရုံး(KNU) လက်အောက်ခံ လက်နက်ကိုင်တပ်ဖွဲ့ တစ်ခုဖြစ်သော ကရင်အမျိုးသားကာကွယ်ရေးတပ်ဖွဲ့(KNDO) နေ့အခမ်းအနားကို ယမန်နေ့က KNDO ဌာနချုပ်၌ ကျင်းပခဲ့ရာ KNUနှင့် ကရင်အမျိုးသားလွတ်မြောက်ရေးတပ်မတော်(KNLA) ထိပ်ပိုင်းခေါင်းဆောင်များ တက်ရောက်ခဲ့သည်။
ထို့ပြင် ကရင်အမျိုးသားကာကွယ်ရေးတပ်ဖွဲ့မှ ထိပ်ပိုင်းခေါင်းဆောင်များ၊ မဟာမိတ်တပ်ဖွဲ့များ၊ မဟာမိတ်တိုင်းရင်းသား ကိုယ်စားလှယ်များနှင့် ဒေသခံပြည်သူလူထု တစ်ထောင်ကျော် တက်ရောက်ဂုဏ်ပြုခဲ့သည်ဟု KNU ဗဟိုက သတင်းထုတ်ပြန်ထားသည်။
အဆိုပါ အခမ်းအနားတွင် KNDO စစ်ဦးစီးချုပ် ဗိုလ်မှူးချုပ် စောရှီးလေက အဖွင့်အမှာစကားပြောကြားခဲ့ပြီး KNU ဥက္ကဋ္ဌ ပဒိုစောကွယ်ထူးဝင်းမှ ပေးပို့သည့် သဝဏ်လွှာကိုလည်း ဖတ်ကြားခဲ့သည်ဟု ဖော်ပြသည်။
KNDO စစ်ဦးစီးချုပ်၏ KNDOနေ့ ပြောကြားချက်တွင် လူထုမျှော်မှန်းသော ပန်းတိုင်သို့ အမြန် ရောက်ရှိနိုင်ရေး ကရင်တစ်မျိုးသားလုံးနှင့် သက်ဆိုင်သည့် အဖွဲ့အစည်း၏ တိုးတက်ရေးတွင် ပူးပေါင်းပါဝင်ကြရန် တိုက်တွန်းခဲ့ကြောင်း ကရင်သတင်းဌာန KICက ဖော်ပြသည်။
“ကျနော်တို့ အချင်းချင်း က မညီညွတ်ဘူး လက်တွဲမလုပ်ဆောင်ဘူးဆိုရင် ကိုယ့်ရန်သူဖြစ်တဲ့ စစ်ကောင်စီက အင်အားစိုက် ဖြိုခွင်းစရာ မလိုဘဲ ပြိုကွဲသွားမှာ ဖြစ်တယ်။ ဒါကြောင့် အတူ တကွ ပူးပေါင်းကြပါ”ဟု ဗိုလ်မှူးချုပ် စောရှီးလေမှ ပြောကြားခဲ့သည်။
အခမ်းအနားတွင် ဗဟိုအမြဲတမ်းကော်မတီဝင် ပဒိုစောသမိန်ထွန်းမှ ကရင်အမျိုးသားကာကွယ်ရေးတပ်ဖွဲ့ဖြစ်ပေါ်လာပုံ သမိုင်းကြောင်းကို ပြောကြားခဲ့ပြီးကေအဲန်ယူကရင်အမျိုးသားအစည်းအရုံး၏ တွဲဘက်အထွေထွေအတွင်းရင်းမှူး(၂) ပဒိုစောလှထွန်းနှင့် ကရင်အမျိုးသားလွတ်မြောက်ရေးတပ်မတော် ဗဟိုစစ်ဌာနချုပ် ဒုဗိုလ်မှူးကြီး စောလာဖော ဂုဏ်ပြုစကား ပြောကြားခဲ့သည်။
