ရှမ်းပြည်နယ်မြောက်ပိုင်း မူဆယ်မြို့ စက်မှုဇုန်ရှိ ကားဝပ်ရှော့တစ်ခုတွင် ယနေ့(သြဂုတ်၅ရက်) က ဗုံးပေါက်ကွဲမှုဖြစ်ခဲ့ပြီး အမျိုးသားတစ်ဦးသေဆုံးကာ ငါးဦးဒဏ်ရာရရှိခဲ့သည်။
မူဆယ်မြို့ စက်မှုဇုန်ရှိ အာနိုးကားဝပ်ရှော့တွင် ပြင်ဆင်ရန် ရပ်ထားသည့် ကားတစ်စီးပေါ်မှ ဗုံး ပေါက်ကွဲခဲ့ခြင်းဖြစ်ကြောင်း မြို့ခံများက ပြောသည်။
” ကားထဲကနေ ပေါက်တာတဲ့။ ကားသမားတစ်ယောက်သေတယ်။ ဒဏ်ရာရသူတွေလည်း ရှိတယ်။ ဘယ်လိုကနေ ဘယ်လိုထပေါက်လဲတော့မသိဘူး”ဟု မူဆယ်မြို့ စက်မှုဇုန်အတွင်း နေထိုင်သူတစ်ဦးက ပြောသည်။
ပေါက်ကွဲမှုသည် အလွန်ပြင်းထန်ပြီး ဝပ်ရှော့အတွင်းရှိ ဆိုင်ကယ်နှင့်ကားအချို့လည်း ပျက်စီးခဲ့ကြောင်း သိရသည်။
မူဆယ်မြို့တွင် ပြီးခဲ့သည့် ဇူလိုင် ၂၉ရက်ကလည်း ဗုံးပေါက်ကွဲမှုဖြစ်ခဲ့သည်။ ထို့အပြင် ဒေသအခြေစိုက် တိုင်းရင်းသားလက်နက်ကိုင်အဖွဲ့များနှင့် စစ်ကောင်စီတပ်ကြား ယခုရက်ပိုင်း တိုက်ပွဲများဖြစ်ပွားနေသည်။
