လက်နက်ခဲယမ်းများစွာသိမ်းဆည်းရရှိဟု ဒေသခံပြော
ကချင်ပြည်နယ် ဖားကန့်မြို့နယ် ဆယ်ဇင်းဒေသ၌ ယနေ့နံနက်က တိုက်ပွဲပြင်းထန်ခဲ့ပြီး စစ်ကောင်စီတပ်က သေဆုံးထိခိုက်များပြားခဲ့ကြောင်း ကချင်ဒေသစစ်ရေးသတင်းရင်းမြစ်နှင့် ဒေသခံ အချို့က ပြောသည်။
“မနက် ၅နာရီ အချိန်မှာ ရင်း(၂၆)နယ်မြေ ဆယ်ဇင်းဘက်တိုက်ပွဲပြင်းထန်နေတယ်။ရှမ်းနီ SNA နဲ့ တပ်မ(၃၃)လက်အောက် ခမရ(၁၁၆) ပူးပေါင်းစစ်ကြောင်းနဲ့ KIA တိုက်ပွဲပြင်းထန်နေတာ။SNAနဲ့ စကစ တပ်ဘက် ထိခိုက်သေဆုံးများနေတယ်။ SNAနဲ့ စကစရဲ့ လက်နက်တွေ အများကြီး သိမ်းဆည်းရရှိထားတယ်လို့ ကြားရတယ်”ဟု ကချင်ဒေသ စစ်ရေးသတင်းရင်းမြစ်က ပြောသည်။
ဖားကန့် ဆယ်ဇင်းဒေသ၌ (၅)မိုင်ခန့်ဝေးသည့် နံ့ကသာနှင့် ပန်ချယ်ကျေးရွာများအနီး ထိုးစစ်ဆင်လာသည့် စစ်ကောင်စီတပ်များကို KIAက ကြားဖြတ်တိုက်ခိုက်ခဲ့ခြင်းဖြစ်သည်ဟု ဆယ်ဇင်းဒေသခံက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
“SNAနဲ့ စကစတွေ ပူးပေါင်းပေါ့။ တော်တော်အထိနာပါတယ်။ ဖြစ်တာက နံ့ကသာ၊ ပန်ချယ်တဲ့ အဲဒီမှာ ဖြစ်တာ။ နှစ်ဖက် စစ်မျက်နှာဖွင့်ထားတာကနေ ထိုးစစ်ဆင်တဲ့သဘော ပေါ့နော်။တခုကြားခဲ့တာတော့ SNAနဲ့ စစ်ကောင်စီဘက်က အများကြီးကျတယ်။ လက်နက်ခဲယမ်းတွေလည်း အများကြီး သိမ်းမိရတယ်။ စာရင်းအတိအကျတော့ မသိရသေးဘူး” ဟုဆယ်ဇင်းဒေသခံက ပြောကြားသည်။
စစ်ကောင်စီနှင့် ရှမ်းနီပူးပေါင်းတပ်၏ ထိခိုက်သေဆုံးအခြေအနေကို သီးခြား အတည်ပြုနိုင်ခြင်းမရှိသေးပေ။
ယမန်နေ့ကလည်း ဆယ်ဇင်းဒေသ၌ KIAနှင့် ထိတွေ့တိုက်ပွဲ တစ်ကြိမ်ဖြစ်ခဲ့သည်ဟု ဒေသခံက ပြောသည်။
ဒေသတွင်း၌ စစ်ကောင်စီတပ်နှင့် ရှမ်းနီတပ်များက ပြည်သူအပေါ် အနိုင်ကျင့်ဖမ်းဆီးနှိပ်စက်သတ်ဖြတ်မှုများ ကျူးလွန်နေ၍ စစ်ကောင်စီတပ်များ အထိနာသည့်အပေါ် ဝမ်းသာကြောင်း ဒေသခံက ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)