ရွေးကောက်ပွဲအတွက် စမ်းသပ်သန်းခေါင်စာရင်းကောက်ယူတာတွေကို စစ်ကောင်စီက အခုလ အောက်တိုဘာလဆန်းကနေစတင်နေပါတယ်။
အောက်တိုဘာလ ၁ ရက်က ၁၅ ရက်အထိ စမ်းသပ်သန်းခေါင်စာရင်းကို မြို့နယ် ၂၀ မှာ ကောက်ယူသွားမှာမယ်လို့စစ်ကောင်စီလဝက ကြေညာပါတယ်။
ဒါပေမယ့် ဘယ်မြို့နယ်တွေလည်းဆိုတာကိုတော့ အသေးစိတ်မပြောထားပါဘူး။
စမ်းသပ်သန်းခေါင်စာရင်းကောက်ယူနေတဲ့ သတင်းတွေကို စစ်ကောင်စီရဲ့ဖော်ပြချက်အရ ပုသိမ်၊ မော်လမြိုင် ၊ ပဲခူး ၊ ရခိုင်ပြည်နယ် မြောက်ပိုင်း မောင်တော ၊ ချင်းပြည်နယ်မြို့တော် ဟားခါး နဲ့ စစ်ကိုင်းတိုင်းမြို့တော် မုံရွာမြို့နယ်တွေပါတာသိရပါတယ်။
ထုတ်ပြန်လာတဲ့ ဓာတ်ပုံတွေအရ သန်းခေါင်စာရင်းကောက်ယူသူတွေကို စစ်တပ်နဲ့ ရဲက လက်နက်ကိုင်လုံခြုံရေး ယူပေးတာလည်းတွေ့ရပါတယ်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
Public Service Announcement
![ဓာတ်ပုံ − စစ်ကောင်စီ](https://i0.wp.com/www.ludunwayoo.com/wp-content/uploads/2023/10/383336562_655850309947098_7230733638553812980_n.jpg?resize=880%2C586&ssl=1)
လက်နက်ကိုင်ခုခံမှုအားကောင်းတဲ့ စစ်ကိုင်းတိုင်းမြို့တော် မုံရွာမြို့ပေါ်မှာ မနေ့က သန်းခေါင်စာရင်းကောက်တာကို မုံရွာအခြေစိုက် အနောက်မြောက်တိုင်းစစ်ဌာနချုပ် တိုင်းမှူးပါ လိုက်လံကြည့်ရှုတာတွေ့ရပါတယ်။
အခုလို စမ်းသပ်သန်းခေါင်စာရင်းကောက်တာဟာ ရွေးကောက်ပွဲမဲစာရင်းအတွက် ဖြစ်တယ်လို့ အာဏာသိမ်း စစ်ခေါင်းဆောင်က ပြီးခဲ့တဲ့သောကြာနေ့ စစ်ကောင်စီအစည်းအဝေးမှာ ပြောခဲ့ပါတယ်။
စမ်းသပ်သန်းခေါင်စာရင်းကောက်တဲ့အတွေ့အကြုံကိုယူပြီး လာမယ့် ၂၀၂၄ ခုနှစ်မှာ ပြည်လုံးကျွတ်သန်းခေါင်စာရင်းကောက်မှာ ဖြစ်ပြီး အဲဒီသန်းခေါင်စာရင်းကနေ မဲစာရင်း အတွက် လူဦးရေစာရင်းရလာမယ်လို့ စစ်ကောင်စီခေါင်းဆောင်က ဆိုပါတယ်။
![ဓာတ်ပုံ − စစ်ကောင်စီ](https://i0.wp.com/www.ludunwayoo.com/wp-content/uploads/2023/10/384437412_655850283280434_4505469075767655062_n.jpg?resize=880%2C586&ssl=1)
အခုနှစ်ဆန်းပိုင်းအတွင်းကလည်းရန်ကုန်အပါအဝင် ဒေသအချို့မှာ စစ်ကောင်စီဟာ မြေပြင်လူဦးရေစာရင်းကောက်ယူတာတွေကို ပြုလုပ်ခဲ့ဖူးပါတယ်။
အဲဒီလို ကောက်ယူချိန်က စစ်ကောင်စီရဲ့ ရွေးကောက်ပွဲဟာအတုအယောင်သာဖြစ်ပြီး တရားမဝင်လို့ လူထုအနေနဲ့ မပူးပေါင်းကြဖို့ ၊ စာရင်းကောက်ယူရာမှာ ပါဝင်သူတွေကို လည်း အကြမ်းဖက်တိုက်ဖျက်ရေးဥပဒေနဲ့အရေးယူမယ်လို့NUG ဘက်က ထုတ်ပြန်ထားခဲ့ပါတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)