ရွေးကောက်ပွဲအတွက် စမ်းသပ်သန်းခေါင်စာရင်းကောက်ယူတာတွေကို စစ်ကောင်စီက အခုလ အောက်တိုဘာလဆန်းကနေစတင်နေပါတယ်။
အောက်တိုဘာလ ၁ ရက်က ၁၅ ရက်အထိ စမ်းသပ်သန်းခေါင်စာရင်းကို မြို့နယ် ၂၀ မှာ ကောက်ယူသွားမှာမယ်လို့စစ်ကောင်စီလဝက ကြေညာပါတယ်။
ဒါပေမယ့် ဘယ်မြို့နယ်တွေလည်းဆိုတာကိုတော့ အသေးစိတ်မပြောထားပါဘူး။
စမ်းသပ်သန်းခေါင်စာရင်းကောက်ယူနေတဲ့ သတင်းတွေကို စစ်ကောင်စီရဲ့ဖော်ပြချက်အရ ပုသိမ်၊ မော်လမြိုင် ၊ ပဲခူး ၊ ရခိုင်ပြည်နယ် မြောက်ပိုင်း မောင်တော ၊ ချင်းပြည်နယ်မြို့တော် ဟားခါး နဲ့ စစ်ကိုင်းတိုင်းမြို့တော် မုံရွာမြို့နယ်တွေပါတာသိရပါတယ်။
ထုတ်ပြန်လာတဲ့ ဓာတ်ပုံတွေအရ သန်းခေါင်စာရင်းကောက်ယူသူတွေကို စစ်တပ်နဲ့ ရဲက လက်နက်ကိုင်လုံခြုံရေး ယူပေးတာလည်းတွေ့ရပါတယ်။
Public Service Announcement
လက်နက်ကိုင်ခုခံမှုအားကောင်းတဲ့ စစ်ကိုင်းတိုင်းမြို့တော် မုံရွာမြို့ပေါ်မှာ မနေ့က သန်းခေါင်စာရင်းကောက်တာကို မုံရွာအခြေစိုက် အနောက်မြောက်တိုင်းစစ်ဌာနချုပ် တိုင်းမှူးပါ လိုက်လံကြည့်ရှုတာတွေ့ရပါတယ်။
အခုလို စမ်းသပ်သန်းခေါင်စာရင်းကောက်တာဟာ ရွေးကောက်ပွဲမဲစာရင်းအတွက် ဖြစ်တယ်လို့ အာဏာသိမ်း စစ်ခေါင်းဆောင်က ပြီးခဲ့တဲ့သောကြာနေ့ စစ်ကောင်စီအစည်းအဝေးမှာ ပြောခဲ့ပါတယ်။
စမ်းသပ်သန်းခေါင်စာရင်းကောက်တဲ့အတွေ့အကြုံကိုယူပြီး လာမယ့် ၂၀၂၄ ခုနှစ်မှာ ပြည်လုံးကျွတ်သန်းခေါင်စာရင်းကောက်မှာ ဖြစ်ပြီး အဲဒီသန်းခေါင်စာရင်းကနေ မဲစာရင်း အတွက် လူဦးရေစာရင်းရလာမယ်လို့ စစ်ကောင်စီခေါင်းဆောင်က ဆိုပါတယ်။
အခုနှစ်ဆန်းပိုင်းအတွင်းကလည်းရန်ကုန်အပါအဝင် ဒေသအချို့မှာ စစ်ကောင်စီဟာ မြေပြင်လူဦးရေစာရင်းကောက်ယူတာတွေကို ပြုလုပ်ခဲ့ဖူးပါတယ်။
အဲဒီလို ကောက်ယူချိန်က စစ်ကောင်စီရဲ့ ရွေးကောက်ပွဲဟာအတုအယောင်သာဖြစ်ပြီး တရားမဝင်လို့ လူထုအနေနဲ့ မပူးပေါင်းကြဖို့ ၊ စာရင်းကောက်ယူရာမှာ ပါဝင်သူတွေကို လည်း အကြမ်းဖက်တိုက်ဖျက်ရေးဥပဒေနဲ့အရေးယူမယ်လို့NUG ဘက်က ထုတ်ပြန်ထားခဲ့ပါတယ်။
