ကချင်လွတ်လပ်ရေးအဖွဲ့(KIO)၏ ယနေ့ အောက်တိုဘာ ၂၅ရက်တွင် ကျရောက်သည့် (၆၃)နှစ် မြောက် KIO ဖွဲ့စည်းတည်ထောင်ခြင်းနေ့ အခမ်းအနားသို့ အမျိုးသားညီညွတ်ရေးအစိုးရက သဝဏ်လွှာပေးပို့ခဲ့ပြီး လွတ်မြောက်ရေး ကြိုးပမ်းမှုအတွင်း မြင့်မြတ်စွာ အသက်ပေးလှူသွားခဲ့ကြသည့် ကချင်တိုင်းရင်းသားများ အားလုံးအတွက် ဦးညွှတ်အလေးပြုကြောင်း ဖော်ပြသည်။
ကချင်လူမျိုးများနှင့် ကချင်ပြည်နယ်၏ လွတ်မြောက်ရေး၊ တန်းတူရေးနှင့် ကိုယ်ပိုင်ပြဌာန်းခွင့်တို့ အတွက် စွမ်းစွမ်းတမံဖော်ဆောင်ကြိုးပမ်းရန် ရည်ရွယ်ချက်ဖြင့် KIOကို ဖွဲ့စည်းတည်ထောင်ခဲ့ခြင်းဖြစ်သည်။
အကြမ်းဖက်စစ်အာဏာသိမ်းမှုများကြောင့် ရည်မှန်းချက်များ ဖျက်ဆီးခံရသည့်အတွက် KIO အနေဖြင့် ဘုံရန်သူဖြစ် သည့် အာဏာသိမ်းစစ်တပ်ကို အခြားတိုင်းရင်းသားများနှင့်အတူ လက်တွဲပြီး ရှေ့တန်းမှ တက်တက် ကြွကြွ ဦးဆောင်တော်လှန်တိုက်ခိုက်လျက်ရှိကြောင်း ဖော်ပြသည်။
![(ကချင်လွတ်လပ်ရေးတပ်မတော် (KIA)မှ ရဲဘော်များအား တွေ့ရစဉ်။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/10/395247035_668451585353637_665856798948121830_n.jpg?resize=763%2C1080&ssl=1)
![(ကချင်လွတ်လပ်ရေးတပ်မတော် (KIA)မှ ရဲဘော်များအား တွေ့ရစဉ်။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/10/395299664_668451628686966_8300329567298728925_n.jpg?resize=763%2C1080&ssl=1)
ယခုပြည်သူ့နွေဦးတော်လှန်ရေးအတွင်း ကချင်လွတ်လပ်ရေးအဖွဲ့(KIO)မှ ကချင်အမျိုးသား ခေါင်းဆောင်ကြီးများ ဦးဆောင်ပြီး မြန်မာတစ်နိုင်ငံလုံးရှိ ပြည်သူများအပါအဝင် အခြားတိုင်းရင်းသား လက်နက်ကိုင်တော်လှန်ရေး အင်အားစုများနှင့် လက်တွဲဆောင်ရွက်နေသည့် အတွက် မကြာမီအနာဂတ်ကာလများတွင် ကချင်အမျိုးသားတို့ လိုလားတောင့်တနေကြသည့် တန်းတူရေးနှင့် ကိုယ်ပိုင်ပြဌာန်းခွင့်အတွက် အပြည့်အဝ အာမခံချက်ရှိသည့် ဖက်ဒရယ်ဒီမိုကရေစီ ပြည်ထောင်စုနိုင်ငံတော်သစ်သို့ ရောက်ရှိနိုင်တော့မည်ဖြစ်သည်ဟုလည်း သဝဏ်လွှာ၌ ပါရှိသည်။
ကချင်တိုင်းရင်းသား ညီအစ်ကိုမောင်နှမများအပါအဝင် KIOမှ ကချင်အမျိုးသား ခေါင်းဆောင်ကြီးများ၊ ရဲဘော်ရဲဖက်များအားလုံး ကိုယ်စိတ်နှစ်ဖြာ ကျန်းမာလုံခြုံ၍ ဘေးရန်အပေါင်းမှ ကင်းကွာပါစေဟုလည်း သဝဏ်လွှာပေးပို့ ဆုတောင်းထားသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
Public Service Announcement
အမျိုးသားညီညွတ်ရေးအစိုးရအနေဖြင့် KIO အပါအဝင် တိုင်းရင်းသားတော်လှန်ရေးအဖွဲ့များနှင့် စစ်ရေး၊ နိုင်ငံရေး ပူးပေါင်းဆောင်ရွက်လျက်ရှိသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)