စစ်ကိုင်းတိုင်း၊ မုံရွာမြို့တွင် စျေးဝယ်ထွက်လာသော စစ်ကောင်စီတပ်သား လေးဦးအား ပစ်ခတ်တိုက်ခိုက်ရာ နှစ်ဦးသေဆုံးကြောင်း Golden Eagle Force-Monywa၏ခေါင်းဆောင် ဗိုလ်လင်းယုန်က ပြောသည်။
ယနေ့ (အောက်တိုဘာလ ၂၆ ရက်) နံနက် ၈ နာရီခန့်က မုံရွာ-အမြင့်လမ်းထိပ်ရှိ လူဝင်မှုကြီးြကပ်ရေးဦးစီးဌာန (လဝက)ရုံးဟောင်း၌ တပ်စွဲထားသော စစ်ကောင်စီဂိတ်စခန်းမှ စစ်ကောင်စိတပ်သား သုံးဦးနှင့် အမျိုးသမီးစစ်မေတစ်ဦးတို့ စျေးဝယ်ထွက်လာချိန် မဟာမိတ်ပူးပေါင်းအဖွဲ့က ပစ်ခတ်တိုက်ခိုက်ခဲ့ခြင်းဖြစ်ကြောင်း Golden Eagle Force-Monywa၏ခေါင်းဆောင် ဗိုလ်လင်းယုန်က ပြောသည်။
ပစ်ခတ်မှုကြောင့် လေးဦးလုံး ထိခိုက်မှုရှိပြီး စစ်သား နှစ်ဦးမှာ ဆေးရုံပို့စဥ် သေဆုံးသွားကြောင်း၊ ကျန် နှစ်ဦးလည်း ထိခိုက်မှုရှိကြောင်း ၎င်းက ဆိုသည်။
သို့သော်ထိခိုက်သေဆုံးမှုကို လူထုနွေဦးက သီးခြားအတည်ပြုနိုင်ခြင်း မရှိသေးပေ။
“သူတို့ဂိတ်နားလေးမှာရှိတဲ့ ရပ်ကွက်ထဲကိုပဲ စျေးလာဝယ်ကြတာ။ အနီးကပ်သွားပစ်ခဲ့တာပါ။ ပေလေးဆယ်၊ ပေငါးဆယ်ဝန်းကျင်လောက်ပဲကွာတယ်။ဂိတ်နဲ့လည်း ကပ်ကပ်လေးပဲ။ သူတို့ကပြန်မပစ်နိုင်ဘူး။ နောက်ကကင်းတွေကတော့ ပြန်ပစ်တယ်။”ဟု ဗိုလ်လင်းယုန်ကဆိုသည်။
Public Service Announcement
ပစ်ခတ်မှုကြောင့် အခင်းဖြစ်ပွားရာအနီးရှိ ဝပ်ရှော့လုပ်သည့်လူငယ်တစ်ဦး ခြေထောက်ကျည်ထိမှန်ဒဏ်ရာရခဲ့ကြောင်း ဒေသခံအချို့က ပြောသည်။
တိုက်ခိုက်မှုဖြစ်ပွားပြီနောက် စစ်ကောင်စီတပ်က အနီးဝန်းကျင်ရပ်ကွက်ရှိ ပြည်သူအချို့အား ဖမ်းဆီးရိုက်နှက်ခြင်းများပြုလုပ်ခဲ့ကြောင်း သိရသည်။
အဆိုပါ စစ်ဆင်ရေးကို Golden Eagle Force-Monywa၊ ပုဏ္ဏကပြောက်ကျားတပ်ဖွဲ့(မုံရွာ)၊ Ka Naung Min Thar Gyi(Monywa)တို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
အောက်တိုဘာ ၂၃ ရက်ကလည်း မုံရွာမြို့နယ် သာစည်ရွာအနီး၌ စစ်ကောင်စီတပ်သား သုံးဦး ပစ်ခတ်ခံရပြီး တစ်ဦးသေဆုံးကာ လက်နက်နှင့်ခဲယမ်းများ သိမ်းဆည်းခံခဲ့ရသည်။
