ကရင်ပြည်နယ်၊ ကော့ကရိတ်မြို့တွင်းမှာ ဒီနေ့မနက်အစောပိုင်းကစတင်ပြီး စစ်ကောင်စီတပ်နဲ့ KNU ပူးပေါင်းတပ်တွေကြား တိုက်ပွဲ ဖြစ်ပွားနေတယ်လို့ မြေပြင်သတင်းရင်းမြစ်တွေထံကသိရပါတယ်။
မနက် ၅ နာရီခွဲခန့်ကစတင်ပြီး ကော့ကရိတ်မြို့ပေါ် ရှိ စစ်ကောင်စီရဲ့ ခလရ (၉၇) တပ်ရင်း ၊ အမှတ် (၃) လုံခြုံရေးဂိတ် နဲ့ ရေကူးကန်ဂိတ်နေရာတွေကို KNU နဲ့ PDF ပူးပေါင်းတပ်တွေက ဝင်ရောက်တိုက်ခိုက်ကြတာပါ။
“ဒီမနက် မြို့ ထဲမှာ တိုက်ပွဲတွေဖြစ်နေကြတယ်၊ တနေ့တုန်းက ဆင်ကုန်း၊ ဒီမနက် ရေကူးကန်ဘက် မြို့ထဲမှာလည်းဝင်တယ် ၊ အခုထိဖြစ်နေတုန်းပဲ” လို့ ဒေသခံတစ်ဦးက ဒီနေ့မနက်ပိုင်း ၁၁ နာရီမှာ ပြောပါတယ်။
ဒီနေ့မနက်ပိုင်းဖြစ်ပွားတဲ့ တိုက်ပွဲမှာ ၂ ဖက် ထိခိုက်ကျဆုံးမှုကို မသိရသေးပါဘူး။
တိုက်ပွဲ ဆက်လက်ဖြစ်ပွားနေဆဲဖြစ်ပြီး အရပ်သားထိခိုက်ဒဏ်ရာရမှုလည်းရှိနေတယ်လို့ ကနဦးမြေပြင်သတင်းတွေအရသိရပါတယ်။
Public Service Announcement
ကော့ကရိတ်မြို့တွင်းမှာ တိုက်ပွဲဖြစ်နေချိန် ၂၆ မိုင်ခန့် အကွာမှာရှိတဲ့ မြဝတီမြို့ကိုလည်း စစ်ကောင်စီတပ်နဲ့ နယ်ခြားစောင့်တပ်(BGF) တို့ က လုံခြုံရေးတိုးချထားတယ်လို့ BGF သတင်းရင်းမြစ်တွေက ပြောပါတယ်။
ကော့ကရိတ်မြို့ဟာ KNU တပ်မဟာ ၆ စစ်ရေးလှုပ်ရှားရာနယ်မြေဖြစ်ပြီး ပြီးခဲ့တဲ့ ရက်ပိုင်းကတင် မြို့ ရဲ့အရှေ့ခြမ်း ဆင်ကုန်းရွာ နားမှာ တိုက်ပွဲတွေ ဖြစ်ခဲ့ပါသေးတယ်။
